JSST missiyasi koronavirus aniqlanmagani aytilgan Tojikiston va Turkmanistonga tashrif buyuradi

Bu haqda JSSTning Yevropadagi hududiy byurosi mintaqaviy direktori Hans Klyuge ta'kidlagan, deb yozadi «Kommersant'».

O‘zbekistonga qo‘shni bo‘lgan bu ikki davlat Jons Hopkins universiteti xaritasida oq rangga bo‘yalgan. Markaziy Osiyoning qolgan uch davlati — O‘zbekiston, Qozog‘iston va Qirg‘izistonda COVID-19 yuqtirib olish holatlari qayd etilgan. Tojikiston va Turkmaniston hukumati esa o‘z hududlarida koronavirus yuqtirganlik holati aniqlanmaganini ta'kidlab kelmoqda.

G‘arbdagilar axborotni yashirish holati yuz berayotgan bo‘lishi mumkinligini ochiqchasiga aytishmoqda. Tojik va turkman rasmiylarining ma'lumotlariga Rossiyada ham bir qadar shubha bilan qaralmoqda, lekin ochiq baholashlardan tiyilib turishibdi.

JSSTning Markaziy Osiyodagi vakillari koronavirus infeksiyasini aniqlab beruvchi testlarning shubhali natijalarini qayta tekshirish bilan bog‘liq qiyinchiliklar borligini tan olishadi, lekin mahalliy hokimiyatlarni ochiqchasiga tanqid ostiga olishdan biroz tiyilishmoqda.

Kutilishicha, JSST ekspertlik missiyasi har ikki davlatga tashrifi yakunlari bo‘yicha ochiq brifing o‘tkazadi hamda mintaqadagi vaziyatga bergan baholarini e'lon qiladi.

Avvalroq Turkmaniston bosh vaziri o‘rinbosari va tashqi ishlar vaziri Rashid Meredov mamlakatda koronavirusga chalinish holatlari yo‘qligini ma'lum qilgan edi.

Tojikiston sog‘liqni saqlash vazirligi va BMTning Tojikistondagi vakili ham mamlakatda virusdan zararlanish holatlari yo‘qligini tasdiqlagan edi. Biroq mamlakat infeksiya tarqalishining oldini olishga doir bir qator choralar ko‘rgan. Jumladan, masjidlarda ibodat qilishga cheklov kiritilgan.

Daily Mail nashrining ma'lumot berishicha, shu kunga qadar 15ta mamlakat va 11ta aholi doimiy yashaydigan hududda koronavirusga chalinish bilan bog‘liq holat qayd etilmagan.