Afg‘oniston prezidenti «Tolibon»ga qarshi hujum boshlashga buyruq berdi

Avvalroq Afg‘oniston hukumati «Tolibon» harakatining ming nafar a'zosini ozodlikka chiqargani xabar qilingandi.

Foto: AP

Afg‘oniston prezidenti Ashraf G‘ani mamlakatdagi barcha kuch ishlatish tuzilmalariga “Tolibon” harakati bilan kurashda "hujum" shakliga o‘tishga buyruq berdi. Bu haqda TOLO News telekanali xabar bermoqda.

Qayd etilishicha, kurashning "faol mudofaa" shaklidan “hujum” shakliga o‘tishga yaqinda sodir bo‘lgan hujumlardan so‘ng qaror qilingan.

Seshanba kuni Afg‘onistonda ikkita terrorchilik hujumi uyushtirildi. Natijada o‘nlab kishilar qurbon bo‘ldi.

Ayni paytda “Tolibon” ushbu hujumlarga aloqadorligini inkor etmoqda.

Avvalroq Afg‘oniston hukumati “Tolibon” harakatining ming nafar a'zosini ozodlikka chiqargani xabar qilingandi.

29 fevralda Dohada AQSh va toliblar o‘rtasida kelishuv imzolangandi. Kelishuvga ko‘ra, AQSh 14 oy ichida o‘z qo‘shinlarini Afg‘onistondan olib chiqib ketishi, mahbuslar almashinuvidan so‘ng tinchlik yo‘lidagi muloqot boshlanishi lozim edi.

#Afg‘oniston #tolibon