Turkiya aeroportlarida 1 iyundan boshlab barcha yo‘lovchilar koronavirusga tekshiriladi

Turkiyada 1 iyundan boshlab xorijdan kelayotgan barcha chet elliklar va mamlakat fuqarolari aeroportlarda koronavirusga test topshirishi majburiy bo‘ladi. Bu haqda mamlakat madaniyat va turizm vaziri Mehmet Ersoyga tayanib Airport Haber xabar qildi.

Vazirning qayd etishicha, koronavirusga test pasport nazoratidan avval o‘tkaziladi. Yo‘lovchilar to‘planishining oldini olish maqsadida tahlil olish 2-3 daqiqadan ortiq vaqtni olmaydi. Test natijalari 5-6 soatdan so‘ng chiqadi. Agarda turistda koronavirus aniqlansa, u mehmonxona xonasida izolyatsiyaga olinadi.

Ma'lumotlarga ko‘ra, Turkiya «Sog‘lom turizm sertifikati» dasturini ishga tushirmoqda. 2020 yil yoz mavsumidan amal qilishni boshlaydigan dastur turizm sohasi vakillari va mamlakatga keladigan mehmonlarning salomatligini asrash, ularni tashish, yashash sharoitlari xavfsizligi bo‘yicha keng ko‘lamdagi choralarni o‘z ichiga oladi.

Turkiyaning O‘zbekistondagi elchixonasi matbuot maslahatchisi Dovud Gazi Benli dastur yuzasidan Kun.uz`ga qo‘shimcha ma'lumot berdi.  

«Xudo xohlasa, 1 iyuldan boshlab O‘zbekiston va Turkiya o‘rtasida muntazam aviaqatnovlar tiklanadi va o‘zbekistonliklar turizm, savdo yoki boshqa maqsadlarda Turkiyaga tashrif buyurishlari mumkin bo‘ladi.

Turizm sohasi tiklanayotgan bo‘lsa-da, barcha mehmonxonalar ham ochilmaydi. Faqat yuqorida ta'kidlangan sertifikatga ega sub'yektlargina faoliyat ko‘rsatishiga ruxsat beriladi», – dedi Dovud Gazi Benli