Boysun bozoridagi ekskavator voqeasi. Vazirlik hokimlikni yolg‘on ma'lumot berishda aybladi

12 may kuni Surxondaryo viloyati Boysun tumanida «Tuzbozor» mahallasi hududida joylashgan dehqon bozoriga kirish qismi ekskavator bilan qazilishiga aholi keskin qarshilik ko‘rsatgani haqida video tarqaldi.

Tadbirkorlar Kun.uz’ga ma'lum qilishicha, tuman hokimi A.Jo‘rayev buyrug‘i bilan ichki ishlar xodimlari tomonidan «Tuzbozor»da ishlovchilar va xaridorlar quvg‘in qilinib, shahardan tashqaridagi sharoiti yo‘q yangi bozorga majburlab ko‘chirilmoqda.

Bundan, ayniqsa, eski bozorda qonuniy do‘konlari bo‘lgan tadbirkorlar aziyat chekishmoqda. Ular ishsiz va xaridorsiz qolishmoqda. Xaridorlar ham yangi bozorga borishni istashmaydi.

Bozorga kirishni qiyinlashtirish uchun unga kiruvchi yo‘l ekskavator bilan qazib tashlanganida aholi va organ xodimlari o‘rtasida katta mojaro kelib chiqqan.

Surxondaryo viloyati hokimligi mazkur masala yuzasidan rasmiy bayonot berib, ekskavator aslida bozorga kirish yo‘lini buzish uchun bormagani, balki «O‘zbektelekom» AK viloyat filiali Boysun telekommunikatsiya bog‘lanmasi tomonidan Alisher Navoiy va Istiqlol ko‘chalari bo‘ylab xalqaro optik tolali aloqa kabelini yotqizish maqsadida bu ko‘chada qazish ishlarini bajarish uchungina kiritilganini ta'kidladi.

«Hozirda mazkur anglashilmovchilik bilan bog‘liq muammo yo‘q. Bu ko‘chalarda xalqaro optik tolali aloqa kabelini yotqizish ishlari o‘rnatilgan tartibda davom ettiriladi», deyilgan rasmiy munosabatda.

Darvoqe, odamlar kunduz kuni ko‘chani qazishga qarshilik ko‘rsatgach, baribir yarim tunda ekskavator bilan bozorga kiruvchi yo‘l qazib tashlangan.

Axborot texnologiyalari va kommunikatsiyalarini rivojlantirish vazirligi rasmiy saytida ma'lum qilinishicha, videolarda Boysundagi chorrahada turgani ko‘ringan ekskavatorning «O‘zbektelekom» AKning Surxondaryo filiali Boysun telekommunikatsiya bog‘lanmasi ish faoliyatiga aloqasi yo‘q.

«Axborot texnologiyalari va kommunikatsiyalarini rivojlantirish vazirligi ushbu rasmiy bayonotdan kelib chiqib shuni ma'lum qiladiki, «Magistral va multiservis ma'lumotlar uzatish tarmog‘ini kengaytirish» (DWDM) loyihasini amalga oshirmoqda.

Loyihani amalga oshirish uchun «O‘zbektelekom» AK Surxondaryo filiali Boysun telekommunikatsiya bog‘lanmasi tuman markazidagi Alisher Navoiy va Istiqlol ko‘chalari kesishmasida 200 metrlik kanalizatsiya qurish ishlarini olib borgan. Qurilish ishlari 2020 yil 6 may kuni tugatilgan.

2020 yilning 12 may kuni «Boysun tumani hokimi eski bozorni buzdirib, savdogarlarni yangi bozorga o‘tkazmoqchi», degan mazmunda e'lon qilingan videomaterialdagi «Tuzbozor» mahallasi hududida joylashgan eski bozorga kiraverishdagi chorrahada turgan ekskavator «O‘zbektelekom» AKning Surxondaryo filiali Boysun telekommunikatsiya bog‘lanmasi faoliyatiga umuman aloqasi yo‘qligini ma'lum qilamiz», deyiladi vazirlik axborot xizmati rasmiy bayonotida.