11 iyun kuni 4 hududda aholi orasida yangi bemorlar aniqlandi, Qashqadaryoda yangi «o‘choq» paydo bo‘ldi

Bugun 7 hududda - Toshkent shahri, Navoiy, Namangan, Qashqadaryo, Sirdaryo, Toshkent viloyatlari hamda Qoraqalpog‘iston Respublikasida yangi holatlar qayd etildi. SSV matbuot xizmati rahbari Furqat Sanayev telegramdagi kanalida bemorlar qayd etilishi va sog‘ayishi bo‘yicha ko‘rsatkichlar jadvalini keltirdi.

Bugungi 118 holatdan 70tasi karantin muassasalarida, 39tasi aholi orasida aniqlangan, xalqaro yuk tashuvchi avtomashina haydovchilari bo‘lgan 9 kishiga ham virusdan zararlanish tashxisi qo‘yilgan. 

Aholi orasida (+39)
Toshkent shahrida bugun aholi orasida 17 kishida virus aniqlandi. SSV ma'lumotiga ko‘ra, so‘nggi kunlarda Toshkentda Yunusobod tuman davlat soliq inspeksiyasining 2 nafar inspektorida, Shayxontohur tumanidagi «Mediapark» savdo majmuasi sotuvchisining onasida, Yunusobod bozoridagi sotuvchilar va ularning oila a'zolarida koronavirus aniqlanmoqda.

Navoiy viloyatida 18 kishiga koronavirusdan zararlanish tashxisi qo‘yildi. Navoiyda shu vaqtgacha qayd etilgan holatlar soni 260taga yetdi va ushbu viloyat umumiy reytingda Xorazmni ortda qoldirib, beshinchi o‘ringa chiqdi.

Namangan viloyatida aholi orasida 3 kishida virus aniqlandi. So‘nggi kunlarda ichki ishlar organlari xodimlarida virus chiqayotgandi.

Toshkent viloyatida aholi orasida bir kishida virus chiqqan. So‘nggi kunlarda viloyatning Toshkent va Bekobod tumanlarida aholi orasida virus qayd etilayotgandi («Amerikan gospital» xususiy klinikasi kichik tibbiyot xodimida va Yunusobod bozorida ziravorlar savdosi bilan shug‘ullanuvchi sotuvchining oila a'zolarida).

Karantin (+70)
Xorijdan kelgach Toshkent viloyatidagi O‘rtasaroy karantin markaziga joylashtirilgan fuqarolar orasida va Toshkent shahridagi karantin muassasalarida jami 42 holat aniqlandi. 

Shuningdek, Qashqadaryo viloyatining Muborak tumanida faoliyat ko‘rsatuvchi xorijiy korxonaning 28 nafar ishchisida virus aniqlandi.

Haydovchilar (+9)
Toshkent viloyatida 4 nafar, Sirdaryo viloyatida 3 nafar, Qoraqalpog‘iston Respublikasida 2 nafar xorijdan kelgan xalqaro yuk tashuvchi avtomashina haydovchilarida virus aniqlangan.

Tuzalganlar (+105)
Bugun Toshkent shahridagi 4ta tibbiyot muassasida jami 79 nafar tuzalib chiqdi, shuningdek, Samarqandda 9, Navoiyda 17 kishiga javob berildi. Shu kungacha tuzalganlar soni  3637 nafar (76 foiz).

Ayni paytda tibbiyot muassasalarida 1085 nafar bemor davolanmoqda, ulardan 10 nafari og‘ir, 2 nafari esa o‘ta og‘ir ahvolda. 

Shu kungacha jami 458 539 nafar fuqaro karantinga olingan bo‘lib, ularning 411 033 nafari karantindan chiqarilgan. 

Hozirda mamlakatda uy karantinida 23 923 nafar, statsionar karantinda esa 23 583 nafar fuqaro tibbiy kuzatuvda bo‘lib turibdi.