Viloyatlarda ochiladigan yuridik fakultetlarga 50 tadan kvota ajratilishi rejalashtirilmoqda 

Bugun, 11 iyun kuni Milliy matbuot markazida o‘tkazilgan matbuot anjumanida Toshkent davlat yuridik universiteti rektori Rahim Hakimov viloyatlarda tashkil etilayotgan yuridik fakultetlar qabuliga oid yangiliklar haqida ma'lumot berdi.

«Ayni paytda Namangan, Samarqand va Termiz davlat universitetida yuridik fakultetlar tashkil etilishi uchun harakatlar olib borilyapti. Yangi o‘quv yilidan ularning har biriga 50 tadan kvota ajratilishi nazarda tutilmoqda», - dedi Rahim Hakimov.

Uning qayd etishicha, bu fakultetlarda faqat bitta yurisprudensiya yo‘nalishida qabul amalga oshirilishi rejalashtirilmoqda.

Rektor, bundan tashqari, Toshkent davlat yuridik universitetida rejalashtirilayotgan qo‘shma dasturlar haqida ham ma'lumot berdi.

«Buyuk Britaniya, Rossiya, Belarus va Qozog‘iston davlatlarining nufuzli universitetlari bilan qo‘shma bakalavr va magistratura ta'lim dasturlarini joriy etish bo‘yicha kelishuvlarga erishildi.

Yangi o‘quv yilidan hamkorlarimiz bilan birgalikda qo‘shma ta'lim dasturlariga ham talabalarni qabul qilish reja qilinyapti. Hamkorlar bilan bugungi kunda eng dolzarb bo‘lgan raqobat huquqi, iqtisodiy huquq, moliya huquqi yo‘nalishlarida qo‘shma dasturlar asosida kadrlar tayyorlash uchun qabul amalga oshirilishiga erishmoqchimiz», - deb ma'lumot berdi Rahim Hakimov.

Yuridik universitet rektorining so‘zlariga ko‘ra, qo‘shma dasturlar asosida tahsil oladigan talabalar ikki yil chetda, qolgan muddatda O‘zbekistonda o‘qish imkoniga ega bo‘lishadi.