Migratsiya agentligi imtihonlaridan muvaffaqiyatli o‘tgan o‘zbekistonliklarni Koreyaga jo‘natish noma'lum muddatga kechiktirilganini ma'lum qildi

«O‘zbekiston Respublikasi hukumati tomonidan Koreya Respublikasi hukumatiga EPS-topik test imtihonlaridan muvaffaqiyatli o‘tib, ish beruvchilardan shartnoma loyihasi kelgan, biroq SOVID-19 virusining tarqalishi sababli Koreya Respublikasiga tashkiliy tarzda keta olmagan va viza tasdiqnomalari amal qilish muddati tugagan fuqarolarning ma'lumotlari Koreya Respublikasi inson resurslarini rivojlantirish xizmatiga taqdim qilingan.

Viza tasdiqnomasi amal qilish muddati tugagan fuqarolarning viza tasdiqnomalari Koreya Respublikasining Inson resurslarini rivojlantirish xizmati tomonidan bosqichma-bosqich uzaytirilmoqda (viza tasdiqnomangiz uzaytirilganligi to‘g‘risidagi ma'lumotni o‘zingizga tegishli shaxsiy kabinetingizdan bilib olishingiz mumkin).

55 nafar fuqarolarning (Ish beruvchi korxona tomonidan shartnoma loyihasi bekor bo‘lgan) ma'lumotlari qayta tanlovlar bazasiga qo‘yilgan. Shulardan 40 nafariga qayta shartnoma loyihalari berilgan.

Hozirgi kunda Koreya Respublikasi erkin yollash tizimi bo‘yicha EPS-topik test imtihonlaridan muvaffaqiyatli o‘tib, ish beruvchilardan shartnoma loyihalari kelgan fuqarolar uchun Koreya Respublikasidagi 3 kunlik majburiy ko‘niktirish darslari bekor qilinganligi sababli Koreya Respublikasiga tashkiliy tarzda jo‘natish vaqtinchalik noma'lum muddatga qadar qoldirilgan», deyiladi agentlik rasmiy xabarida.

Tashqi mehnat migratsiyasi agentligi fuqarolik pasportidagi xorijga chiqish ruxsatnomasi amal qilish muddati tugagan va tugash arafasida bo‘lgan fuqarolarga zudlik bilan xorijga chiqish pasportini rasmiylashtirish kerakligini eslatgan.

Qayd etilishicha, shartnoma loyihalari hamda viza tasdiqnomalari kelgan fuqarolarning hujjatlarini o‘rnatilgan tartibda qabul qilish sanalari to‘g‘risida agentlik tomonidan qo‘shimcha ravishda e'lon qilinadi.

Avvalroq Kun.uz’ga murojaat qilgan o‘zbekistonliklar 600dan ortiq fuqaro bir necha yil davomida koreys tilini o‘rganib, imtihonlardan o‘tishgan, biroq qo‘llarida viza hamda Koreyadagi ish beruvchilar bilan shartnomalari bo‘lsa-da, ishlash uchun Koreyaga keta olmayotganliklarini aytgan edi.

Tashqi mehnat migratsiyasi agentligi 10 iyul kuni O‘zbekistondan borganlarning ikki nafarida virus aniqlangani uchun mehnat ta'tiliga kelgan fuqarolarni Koreyaga yuborish kechiktirilganini ma'lum qildi.