O‘zbekiston | 21:54 / 18.07.2020
11942
2 daqiqa o‘qiladi

Toshkentda tez yordam 15 daqiqada yetib borishi uchun rag‘batlantirish tizimi yo‘lga qo‘yiladi

Foto: KUN.UZ

Toshkent shahar hokimligi matbuot kotibi Furqat Mahmudxo‘jayev tez yordam xizmatining samarali ishlashi uchun ko‘rilayotgan choralar haqida ma'lumot berdi.

Unga ko‘ra, soat 18:00dan 24:00ga qadar bo‘lgan vaqti oralig‘ida tez yordam xizmatiga eng ko‘p murojaatlar kelib tushadi, shu bois bu vaqtda xizmat ko‘rsatish uchun eng tajribali operatorlar tanlab olinmoqda.

«Yaxshi ishlagan operatorlarni rag‘batlantirish tizimi yo‘lga qo‘yilmoqda. Har bir qabul qilingan va sifatli qayta ishlangan qo‘ng‘iroq uchun 1500 so‘m, a'lo muomala uchun 500 so‘m qo‘shimcha haq to‘lash tizimi joriy etiladi.

Shuningdek, tez yordam brigadasi 15 daqiqadan ko‘p bo‘lmagan vaqtda yetib borishi choralari ko‘riladi. Yaxshi ishlagan brigadalar uchun rag‘batlantirish tizimi qo‘llaniladi.

Bundan tashqari, joylardagi avtoparklarga qo‘shimcha ravishda 25ta «Damas» rusumli tez yordam mashinasi yetkazib berildi», – deya Mahmudxo‘jayevning 18 iyul kuni AOKAda bo‘lib o‘tgan brifingdagi so‘zlarini keltirmoqda Kun.uz muxbiri.

Ma'lum qilinishicha, Toshkent shahar Sog‘liqni saqlash boshqarmasi tasarrufidagi tibbiyot muassasalaridagi 423ta bo‘sh ish o‘rnini malakali mutaxassislar bilan zudlik bilan ta'minlash choralari ko‘rilmoqda.

«Toshkent shahridagi 42ta kasalxonaning 1 haftalik ehtiyoji uchun 70 mingta tibbiy niqob, 70 mingta tibbiy kombinezon, 150 mingta tibbiy qo‘lqop, 3 mingta tibbiy ko‘zoynak, 5 mingta tibbiy bosh kiyim, 200 ming baxilla yetkazib berildi.

Toshkent shahridagi tibbiyot oliy ta'lim muassasalari va markazlarining 284 nafar xodimi uy sharoitida davolanayotgan bemorlar holidan xabar oladi», – dedi Toshkent shahar hokimligi rasmiysi.

Mavzuga oid