Joriy yilda aholining ichimlik suvi bilan ta'minlanganlik darajasi 72 foizga yetadi

Vazir o‘rinbosarining ta'kidlashicha, O‘zbekiston Respublikasi prezidentining joriy yil 10 yanvardagi tegishli qarori bilan tasdiqlangan 2020 yilgi Investitsiya dasturi doirasida Moliya vazirligi huzuridagi Suv ta'minoti va kanalizatsiya tizimlarini rivojlantirish jamg‘arma hisobidan 216 ta obektda 3400 km ichimlik va oqova suv tarmoqlari hamda 120 ta suv inshootlarini qurish va rekonstruksiya qilish uchun 1 trillion 277 milliard so‘m mablag‘ ajratilgan.

Shuningdek, xalqaro moliya institutlari ishtirokida amalga oshirilayotgan investitsiya loyihalarida O‘zbekiston Respublikasi ulushini moliyalashtirish uchun 78 milliard so‘m mablag‘ ajratish ko‘zda tutilgan.

«Bundan tashqari, O‘zbekiston Respublikasi Prezidentining 2020 yil 19 martdagi «Koronavirus pandemiyasi va global inqiroz holatlarining iqtisodiyot tarmoqlariga salbiy ta'sirini yumshatish bo‘yicha birinchi navbatdagi chora-tadbirlar to‘g‘risida»gi farmoni bilan suv ta'minoti va oqova suv tizimlarini yaxshilash ishlariga joriy yilgi Investitsiya dasturiga qo‘shimcha ravishda 500,0 milliard so‘m mablag‘ ajratilgan.

Bugungi kunda, hukumatimizning tegishli topshirig‘iga muvofiq mazkur ajratilgan mablag‘lar amalga oshirilishi lozim bo‘lgan 59ta loyiha uchun Moliya vazirligi huzuridagi Inqirozga qarshi kurashish jamg‘armasi hisobidan jami 145 milliard so‘m mablag‘lar moliyalashtirilib berilgan», - deya qo‘shimcha qildi Adiz Boboyev.

2019 yilgi Investitsiya dasturi doirasida jamg‘arma hisobidan respublikada ichimlik suv ta'minoti va oqova suv tizimlarini yaxshilash uchun 1,1 trillion so‘m mablag‘ ajratilgandi. Bundan tashqari, O‘zbekiston Respublikasi Prezidentining 2018-2019 yillarda hududlarga amalga oshirgan tashriflarida davomida bergan topshiriqlari, shuningdek, Vazirlar Mahkamasining tegishli qaror va farmoyishlariga muvofiq 2019 yilda qo‘shimcha ravishda 635 milliard so‘m ushbu maqsadlarga ajratildi.

Bildirilishicha, mazkur mablag‘lar doirasida 2020 yilning 1 yanvar holatiga haqiqatda bajarilgan qurilish-montaj ishlari uchun jamg‘arma hisobidan 1 trillion 664 milliard so‘m mablag‘lar moliyalashtirilib berilgan.

Iqtisodiy taraqqiyot va kambag‘allikni qisqartirish vazirligi ma'lumotiga ko‘ra, 2019 yilgi Investitsiya dasturi doirasida 150ta hamda «Obod qishloq» va «Obod mahalla» dasturlari doirasida 165ta aholi punktlarida joylashgan 477ta ichimlik suvi va 8 oqova suv inshootlarida qurilish va rekonstruksiya qilish ishlari amalga oshirilib, 4 681 km uzunlikdagi ichimlik suvi va 215 km uzunlikdagi oqova suv quvurlari yotqizildi.

 Natijada, 2020 yilning 1 yanvar holatiga respublika aholisini ichimlik suv bilan ta'minlash darajasi 68 foizdan 70 foizga oshgan.

Jumladan, 2018-2019 yilgi Investitsiya dasturlari doirasida jamg‘arma hisobidan Surxondaryo viloyatida «Boysun tuman markazi va qishloq aholi yashash punktlarini «Xo‘jamayxona» bulog‘idan suv bilan ta'minlash» loyihasi uchun 51 milliard so‘m mablag‘ ajratilib, obekt foydalanishga topshirildi hamda Boysun tuman markazi va unga tutash bo‘lgan qishloq aholi punktlarida yashovchi 50 mingdan ortiq aholi kafolatlangan va sifatli toza ichimlik suvi bilan ta'minlandi.

Ma'lumot uchun, O‘zbekiston Respublikasi Prezidentining 2017 yil 20 apreldagi «2017-2021 yillarda ichimlik suvi ta'minoti va kanalizatsiya tizimlarini kompleks rivojlantirish hamda modernizatsiya qilish Dasturi to‘g‘risida»gi qarori bilan Moliya vazirligi huzuridagi Suv ta'minoti va kanalizatsiya tizimlarini rivojlantirish jamg‘armasi tashkil etilgan.

Ushbu jamg‘armaning daromad manbalari:

• suv resurslaridan foydalanganlik uchun olinadigan soliq bo‘yicha tushumlarga mos ravishda davlat budjetidan ajratiladigan ajratmalar;
• maqsadli budjet ajratmalari;
• xalqaro moliya tashkilotlarining imtiyozli kreditlari;
• xalqaro donorlarning grantlari;
• Qoraqalpog‘iston Respublikasi budjeti, viloyatlar va Toshkent shahri mahalliy budjetlarining mablag‘lari;
• jamg‘armaning vaqtincha bo‘sh mablag‘larini joylashtirishdan olinadigan daromadlar va qonun hujjatlarida taqiqlanmagan boshqa tushumlar hisoblanadi.

Qaror bilan bilan ichimlik suvi ta'minoti va oqova suv tizimlarini yaxshilash bo‘yicha tasdiqlangan dasturlarni amalga oshirilishi uchun o‘z vaqtida moliyalashtirilishini tashkil etish, Investitsiya dasturlarini shakllantirishda zarur bo‘lgan mablag‘lar miqdori va manbalari bo‘yicha takliflar tayyorlash jamg‘armaning asosiy vazifalari etib belgilandi.