21:54 / 23.07.2020
7451
АҚШ Ҳьюстондаги консулликни ёпиш учун Хитойга 72 соат вақт берди
Фото: Reuters

АҚШ Ҳьюстондаги консулликни ёпиш учун Хитойга 72 соат вақт берган. Акс ҳолда президент Трамп Хитой фойдасига жосуслик қилишда айбланаётган консулликка қарши қўшимча чоралар қўлланилиши мумкинлигини билдирган.

«АҚШнинг интеллектуал мулки ва маҳфий маълумотларини ҳимоя қилиш учун Хитойнинг Ҳьюстондаги бош консуллигини ёпиш тўғрисида буйруқ берилди», деди АҚШ Давлат департаменти матбуот котиби Морган Ортагус чоршанба куни ўтказилган матбуот анжуманида.

Ушбу матбуот анжуманида қатнашган Дональд Трамп Хитойнинг нафақат Ҳьюстондаги, балки АҚШдаги бошқа ваколатхоналарини ёпиш ҳам «қийин иш эмаслигини» таъкидлаган: «Биз Ҳьюстондаги консулликни ёпишга қарор қилганимизда у ерда ёнғин содир бўлаётган эди. Афтидан улар муҳим ҳужжатларни ёки қоғозларни ёқишди ва менга у ерда нима бўлганини билиш қизиқ», деган Трамп.

Хитой Ташқи ишлар вазирлиги вакили маълум қилишича, Ҳьюстондаги консуллик одатдагидек ишлаяпти. Шунингдек, консуллик таҳдидли хабарлар олган: «Хитойнинг Вашингтондаги элчихонаси АҚШ ҳукумати томонидан илгари сурилаётган туҳмат ва нафрат айбловлари туфайли портлатиб юборилиш ва ўлим таҳдиди ёзилган хабар олган. АҚШ Хитойнинг Ҳьюстондаги консуллигини ёпиш ҳақидаги қарорини бекор қилиши керак. Акс ҳолда Хитой бунга қарши муносиб жавоб беради», деб ёзган Хитой ТИВ вакили Хуа Чуньин твиттердаги саҳифасида.

Top