Uzrli sabab bilan testda ishtirok etmagan abituriyentlarning to‘lovi qaytariladi – DTM

Qabul masalasiga bag‘ishlangan brifingda kirish imtihonlariga qatnasha olmagan abituriyentning test sinovlarida qatnashish uchun qilgan to‘lov puli qaytarilishi to‘g‘risidagi savolga javob berilgan edi.

DTM direktori o‘rinbosari Sardor Rajabov test sinovlariga qatnasha olmagan abituriyent uchun ham joy, kerakli sharoit tayyorlanishi, nazoratchilar biriktirilishi, shuning uchun ham qilingan to‘lov puli qaytarilmasligini ma'lum qilgandi.

Davlat test markazi bu javobning ijtimoiy tarmoqlarda noto‘g‘ri talqin etilgan deb hisoblab, o‘z rasmiy kanalida munosabat e'lon qildi.

«Test sinovi uchun to‘lovni qaytarib berish masalasi bo‘yicha savolga berilgan javob ijtimoiy tarmoqlarda noto‘g‘ri talqin qilinmoqda. Test sinovi uchun to‘lovni amalga oshirgan abituriyentlarning to‘lovi har qanday holatda ham qaytarilmaydi degan tushuncha butunlay xato.

Misol uchun, dastlab test sinovlari o‘tkaziladigan ta'lim yo‘nalishiga ro‘yxatdan o‘tgan va to‘lovni amalga oshirgan, keyinchalik esa tanlagan ta'lim yo‘nalishini to‘liq ijodiy imtihon bo‘ladigan yo‘nalishga o‘zgartirgan abituriyentlarning yoki shu kabi to‘lovni noto‘g‘ri amalga oshirgan abituriyentlarning to‘lovlari hozirgi kunda Davlat test markazi tomonidan abituriyentlarga qaytarilmoqda», deyiladi DTM xabarida. 

Qayd etilishicha, test sinovlaridan so‘ng uzrli sabablarga ko‘ra imtihonda ishtirok eta olmagan abituriyentlarning to‘lovlari ham qaytariladi.