Toshkentda 22 yoshli homilador ayol, Sirdaryoda ikki kun oldin shifoxonaga yotqizilgan 70 yoshli otaxon koronavirusdan vafot etdi

Haftalardan buyon o‘limlar qaysi sanada ro‘y bergani ochiqlanmayapti. Rasmiy xabarlarda barcha vafot etganlar shifoxonada davolanishi jarayonida mutaxassislar tomonidan «konsultatsiya va konsiliumlar qilingani, davolash jarayoni mutaxassislar tavsiyasi asosida olib borilgani» alohida ta'kidlanadi.

SSV rasman qayd etgan qurbonlar soni 131tani tashkil etmoqda.

Yakkasaroy tumanida yashagan va 19 iyulda koronavirus tashxisi qo‘yilgan 52 yoshli erkak vafot etdi.

Toshkent shahar Yakkasaroy tumanida yashagan 52 yoshli O.T. (erkak)da joriy yil 19 iyul kuni COVID-19 infeksiyasi tasdiqlangan va Zangiota tumanidagi Respublika ixtisoslashtirilgan ko‘p tarmoqli yuqumli kasalliklar shifoxonasiga yotqizilgan.

Unga COVID-19 infeksiyasining o‘ta og‘ir kechishi va ikki tomonlama pnevmoniya tashxisi qo‘yilgan. Kasallik o‘tkir respirator disstres sindrom, o‘tkir nafas yetishmovchiligi asoratlari bilan kechgan.

Bemorning ahvoli asosiy kasallik asoratlari hisobiga keskin og‘irlashib, reanimatsion muolajalarga qaramay o‘tkir nafas va yurak qon-tomir yetishmovchiligidan vafot etgan.

O‘zbekiston Moliya vaziri o‘rinbosari Yorqin Tursunov 55 yoshida koronavirus asoratlaridan vafot etdi.

Toshkent shahar Mirzo Ulug‘bek tumanida yashagan 55 yoshli Yo.T. (erkak)da joriy yil 20 iyul kuni tana harorati ko‘tarilgan va xususiy tibbiyot muassasasi shifokorlarining tavsiyasi asosida uy sharoitida va xususiy shifoxonada davolangan.

27 iyul kuni esa o‘ta og‘ir holatda Toshkent tibbiyot akademiyasining ko‘p tarmoqli klinikasiga yotqizilgan. Unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan.

Xastalik o‘tkir respirator distress sindromi, o‘tkir nafas yetishmovchiligining 3-darajasi, o‘pka shishi, giperglikemik koma kabi asoratlar bilan kechgan.

Shuningdek, bemor qandli diabet, yurak ishemik kasalligi, zo‘riqish stenokardiyasi, gipertoniya, arterial gipertenziya kabi hamroh kasalliklar bilan ham og‘rigan.

Reanimatsion muolajalarga qaramasdan bemorning ahvoli keskin og‘irlashib, o‘tkir nafas va yurak qon-tomir yetishmovchiligi, o‘pka shishi, giperglikemik komadan vafot etgan.

Sirdaryo viloyatida 70 yoshli otaxon koronavirus qurboni bo‘ldi. U 27 iyul kuni shifoxonaga yotqizilgan.

Sirdaryo viloyati Oqoltin tumanida yashagan 70 yoshli M.T. (erkak)da joriy yil 15 iyul kunidan tana harorati ko‘tarilib turgan. 27 iyul kuni holsizlik, butun tanada og‘riq kuzatilgani sababli Respublika shoshilinch tibbiy yordam ilmiy markaziga yotqizilgan.

Unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan.

Xastalik o‘tkir nafas va yurak qon-tomir yetishmovchiligi asoratlari bilan kechgan. Shuningdek, bemor qandli diabet, yurak ishemik kasalligi, zo‘riqish stenokardiyasi, gipertoniya kabi hamroh kasalliklar bilan ham og‘rigan.

Reanimatsion muolajalarga qaramasdan bemorning ahvoli keskin og‘irlashib, o‘tkir nafas va yurak qon-tomir yetishmovchiligidan vafot etgan.

Chilonzorda yashagan, 13 iyuldan buyon reanimatsiyada bo‘lgan 48 yoshli erkak vafot etdi.

Toshkent shahri Chilonzor tumanida yashagan 48 yoshli X.M. (erkak) 13 iyul kuni Toshkent tibbiyot akademiyasining ko‘p tarmoqli klinikasining reanimatsiya bo‘limiga og‘ir ahvolda yotqizilgan.

Bemorga COVID-19 infeksiyasining o‘ta og‘ir kechishi va ikki tomonlama pnevmoniya tashxisi qo‘yilgan.

Bemorda kasallik o‘tkir respirator distress sindromi, o‘tkir nafas yetishmovchiligining 3-darajasi, terminal o‘pka shishi, poliorgan yetishmovchilik asoratlari bilan kechgan.

Shuningdek, bemorda yurak ishemik kasalligi, zo‘riqish stenokardiyasi, gipertoniya, arterial gipertenziyaning 2-darajasi kabi hamroh kasalliklar ham kuzatilgan.

Asosiy kasallik asoratlari hisobiga bemorning ahvoli stabil og‘ir bo‘lib, reanimatsion choralarga qaramasdan, o‘tkir nafas va yurak qon-tomir yetishmovchiligi, o‘pka shishi, poliorgan yetishmovchilikdan vafot etgan.

Toshkentda ikkinchi farzandiga homilador bo‘lgan 22 yoshli ayol koronavirusdan vafot etdi.

Toshkent shahar Uchtepa tumanida yashagan 22 yoshli O.X. (ayol) 15–18 iyul kunlari Toshkent shahar 9-son tug‘ruq kompleksi reanimatsiya bo‘limida «2-homiladorlik, 2-tug‘ruq, o‘tkir kamsuvlik, ikki tomonlama pnevmoniya» tashxisi bilan statsionar sharoitida davolangan.

18 iyul kuni bemorda COVID-19 tasdiqlangach, Toshkent shahar 3-son tug‘ruq kompleksiga o‘tkazilgan. Ushbu shifoxonada unga COVID-19 infeksiyasining og‘ir kechishi, ikki tomonlama pnevmoniya tashxisi ko‘yilgan. Kasallik o‘tkir nafas va yurak-qon tomir yetishmovchiligi asorati bilan kechgan.

Biroq shifokorlar tomonidan standartlar asosida o‘tkazilgan reanimatsion muolajalarga qaramasdan bemorning ahvoli keskin og‘irlashib, o‘tkir nafas va yurak qon-tomir yetishmovchiligidan vafot etgan.