Yetakchi IT-kompaniyalar bir kun ichida 250 milliard dollarga qimmatladi

Dunyoning eng yirik IT-kompaniyalari - Amazon, Apple, Facebook va Google Alphabet’ning bozor narxi 30 iyulda 250 mlrd dollarga qimmatlab, 5 trln dollardan oshdi.

Bloomberg axborot agentligining xabar berishicha, IT-gigantlar aksiyalari narxlari keskin oshishi ularning 2019-2020 moliyaviy yilning 3-choragi bo‘yicha moliyaviy hisobotlari e'lon qilingandan keyin yuz bergan.

Apple’ning aprel-iyundagi sof daromadi 2019 yilning shu davridagiga nisbatan 18 foizga oshib, 16,3 mlrd dollarga yetgan, tushumi esa 11 foizga oshib, 59,7 mlrd dollarni tashkil qilgan.   

Amazon’ning sof daromadi esa birja tahlilchilari prognozidan 10 marta ko‘proqni tashkil qilgan va bir aksiyaga 10,3 foizga yetgan. Kompaniyaning tushumi 40 foizga oshib, 88,91 mlrd dollarga yetgan.  

Facebook’ning 3-chorak bo‘yicha tushumi 18,7 mlrd dollarni, sof daromadi bir aksiyaga 1,8 dollarni tashkil qilgan. 

Google Alphabet’ning sof daromadi esa prognoz qilingan bir aksiyaga 8,21 dollar o‘rniga 10,13 dollarni tashkil qilgan. Kompaniya tushumi esa chorak yakunlariga ko‘ra 38,30 mlrd dollarga yetgan. Bu qiymatdan 3,81 mlrd dollari YouTube’ga, 3,01 mlrd dollari esa bulutli xizmatlarga to‘g‘ri kelgan.