Oltin narxi ilk bor 2 ming dollardan oshdi

Oktyabrda yetkazib beriladigan oltin narxi savdolar vaqtida unsiyasi uchun 2002 dollarga yetgan va avvalgi savdo sessiyasiga nisbatan 1,4 foizga oshgan. Shuningdek, dekabrda yetkazib beriladigan oltin ham 1,4 foizga qimmatlab, narxi 2013,5 dollargacha ko‘tarilgan.

Umuman olganda, qimmatbaho metall yil boshidan beri 25 foizdan ko‘proqqa qimmatlagan. Mutaxassislar buni koronavirus pandemiyasi ortidagi mavhumlik bilan bog‘lashmoqda. Oltin inflatsiyadan va valutalarning qadrsizlanishidan himoyalovchi aktiv sifatida baholanmoqda. 

Boshqa qimmatbaho metallar – kumush, platina va palladiyga ham talab oshgan.

Goldman Sachs tahlilchilari oltin narxi 12 oy ichida 2300 dollarga ko‘tarilishini prognoz qilishmoqda. Bunga AQShda foiz stavkalari pasayotgani va oltinga talab oshishi turtki bermoqda.