19:31 / 24.08.2020
16242
Инқирозга қарши кураш жамғармаси маблағларининг сарфланиши бўйича батафсил маълумотлар очиқланди

Ташқи қарзлар ҳисобига шакллантирилган жамғарма маблағларининг 67 фоизи ишлатиб бўлинди.

Молия вазирлиги Инқирозга қарши кураш жамғармаси маблағлари ҳисобидан амалга оширилган давлат харидлари бўйича батафсил маълумотларни эълон қилди.

Ҳисоботлардан кимга қанча маблағ ажратилгани, давлат харидлари бўйича тузилган шартномалар, етказиб берувчиларнинг бенефициарлари каби ахборотлар ўрин олган.

Шу мақсадда Молия вазирлиги сайтида интерактив саҳифа очилган. Айни пайтдаги маълумотлар 18 август ҳолатига келтирилган бўлиб, саҳифа ҳар ҳафтада янгилаб борилиши маълум қилинди.

Ушбу маълумотларнинг очиқланиши эндиликда кенг жамоатчиликка мустақил суриштирувлар ўтказиш имконини беради.

Эслатиб ўтамиз, Инқирозга қарши жамғармага 10 триллион сўм йўналтирилган бўлиб, у учта халқаро ташкилотдан олинган қарзлар ҳисобига шакллантирилган: 41,9 фоиз – Осиё тараққиёт банки, 37,9 фоиз – Халқаро валюта жамғармаси, 20,2 фоиз – Халқаро тикланиш ва тараққиёт банки томонидан ажратилган маблағлардир.

18 август ҳолатига кўра, жамғармадан 8 448,7 млрд. сўм миқдорида маблағ ажратилган бўлиб, шундан 6 753,5 млрд. сўми тегишли ташкилотлар томонидан ўзлаштирилган.

Top