Rospotrebnadzor mutaxassislari O‘zbekistonga koronavirusga qarshi kurashda yordam beradi

Rossiyaning Rospotrebnadzor mutaxassislari guruhi O‘zbekistonga koronavirusga qarshi kurashda yordam berish uchun keldi. Bu haqda O‘zA xabar berdi.

Guruh umumiy hisobda 7 mutaxassisdan iborat bo‘lib, ular orasida epidemiolog, virusolog, infeksionistlar bor. Ular Respublika sanitariya-epidemiologik osoyishtalik Agentligi va uning bo‘ysunuvidagi tashkilotlarda ish olib borishadi.

Rossiyalik mutaxassislar 23 avgustdan 5 sentyabrgacha koronavirusga qarshi kurash bo‘yicha konsultativ yordam beradilar. Ular tashrif davomida O‘zbekistonda koronavirus tarqalishi bilan bog‘liq epidemiologik vaziyat bilan tanishishni va koronavirusning diagnostikasida ishtirok etuvchi epidemiologik nazorat va laboratoriyalar, koronavirusga chalinganlarni davolashga ixtisoslashgan davolash muassasalari faoliyatini batafsil o‘rganishni rejalashtirishgan.

Rospotrebnadzor delegatsiyasi poytaxt Toshkentdan tashqari, Toshkent, Samarqand va Jizzax viloyatlaridagi tibbiyot muassasalariga tashrif buyuradi. Rossiyalik mutaxassislar tomonidan ilmiy-amaliy tadbirlar, onlayn-konsultatsiyalar o‘tkaziladi va Rossiyada koronavirusga qarshi kurashdagi eng yaxshi amaliyotlarni O‘zbekistonda tatbiq qilish imkoniyati ko‘rib chiqiladi.

Avvalroq, 16 agustda O‘zbekistonga koronavirusga qarshi kurashda yordam berish uchun 40 nafar rossiyalik mutaxassis kelgandi. Guruh tarkibiga shifokor-reanimatologlar, pulmanologlar, infeksionistlar, kardiologlar va endokrinologlar kirgan. Ular bir oy davomida poytaxt va viloyatlardagi shifoxonalarda ish olib borishadi.