O‘zbekiston | 20:08 / 27.08.2020
9030
6 daqiqa o‘qiladi

«Hademay yana sovuq kunlar boshlanadi, biz dardimizni kimga aytaylik?» – Yakkabog‘dagi qishloq muammolari

Saytimizga Qashqadaryo viloyati Yakkabog‘ tumani Xonimqo‘rg‘on qishlog‘idan murojaat kelib tushdi. Unda elektr transformatorining eskiligi va bir necha qishloq ahli uchun xizmat qilayotgani, aholi o‘zi o‘rnatgan elektr simyog‘ochlari nobopligi, undagi simlar ming bir joydan ulanib ketgani va yo‘llarning abgor holati haqida so‘z boradi.

Murojaatda aytilgan holatlarni o‘rganish maqsadida Yakkabog‘ tumani Xonimqo‘rg‘on qishlog‘ida bo‘ldik.

Qishloq ahlining aytishicha, bu yerlar eski va yangi cheklarga bo‘lingan; murojaat esa yangi chek yerlarida yashab kelayotgan fuqarolar tomonidan yo‘llangan.

Xonimqo‘rg‘on, shuningdek, qo‘shni Bolg‘ali qishlog‘i bilan uzviy bog‘langan. Bu ikki qishloq uchun yoshi 60ga yaqinlashgan «bobo transformator» xizmat qilib kelmoqda. Kengaygandan kengayayotgan qishloqlar uchun esa birgina transformator kuchi kamlik qilishi tabiiy, albatta.

«Dardimizni kimga aytaylik?»

Yuqorida ta'kidlaganimizdek, qishloqning bu qismi yangi chek yerlari bo‘lib, yaqin 10-12 yildan beri aholiga turar joy sifatida berib kelingan. Fuqarolarning ma'lum qilishicha, yog‘in-sochinli kunlarda loyga belanadigan qishloq yo‘llari foydalanishga yaroqsiz holga kelib qoladi. «Kattalar-ku mayli, yosh bolalar maktabga borishda juda qiynaladi», deydi qishloq ahli.

«Bu yerlarda uy qurib yashay boshlaganimizdayoq o‘zimiz simyog‘ochlar topib, kalta-kulta simlar topib ulab elektr toki o‘tkazganmiz, to‘lovlarni doimiy tarzda to‘lab kelamiz.

Biz transformator va ko‘chaga tosh yotqizish masalasi bo‘yicha tuman hokimligiga joriy yil qish oylarida ariza bilan chiqqan edik. Afsus, shuncha oydan beri muammo hal bo‘lmadi. Ikkala masala bo‘yicha ham «bugun bo‘ladi, erta bo‘ladi», deb turli xil vajlar ko‘rsatilib, muammo hal etilmayapti. Hademay yana sovuq kunlar boshlanadi, biz dardimizni kimga aytaylik?

Sim uzilsa, nozikligidan simyog‘ochga chiqib bo‘lmaydi. Elektr ta'mirlash korxonasi xodimlari simni ulab berishi uchun narvonlar olib kelamiz. Simlardagi ulangan joylarning-ku hisobida adashib ketasiz», – deydi qishloq faollaridan biri Anvar Xoliyorov.

Muammo yil oxirigacha hal etilishi va'da qilingan

Muammo yuzasidan tuman hokimligi, tuman elektr tarmoqlari korxonasiga bir necha bor murojaat qilingan, ammo amaliy natija bo‘lmagan. 2020 yil 25 fevralda Yakkabog‘ tuman hokimiga qishloq uchun alohida transformator o‘rnatib berilishini, qishloqning ichki yo‘llariga qum-shag‘al to‘kib ta'mirlanishida amaliy yordam berishini so‘rab qilgan murojaati tuman tegishli tashkilotlari tomonidan o‘rganilgan.

Yakkabog‘ TETK tomonidan berilgan munosabatda Xonimqo‘rg‘on qishlog‘i aholisi o‘sib borayotgani sababli transformator quvvati yetmayotgani aniqlangani va 2020 yil rejasiga kiritilgani ma'lum qilingan.

Tuman obodonlashtirish boshqarmasi boshlig‘i S.Suyunov esa Xonimqo‘rg‘on qishlog‘i ichki yo‘llari 2021 yil davlat dasturiga kiritilib, pul mablag‘i bilan moliyalashtirilgandan so‘ng joriy ta'mirlanishini ma'lum qilgan. Suyunovning javob xatida ushbu javob qanoatlantirmasa, yuqori turuvchi organlarga murojaat qilishi mumkinligi aytilgan.

Shundan so‘ng qishloq fuqarosi Anvar Xoliyorov prezident virtual qabulxonasiga mazkur ikki muammo bo‘yicha murojaat yo‘llagan. Viloyat hokimi o‘rinbosari S.Azizovning 2020 yil 1 aprelda bu murojaat yuzasidan yuborgan xatida qishloq ichki yo‘llari Yakkabog‘ tuman hokimligining 2020 yil qo‘shimcha budjet mablag‘lari hisobidan qum-shag‘al aralashmasi bilan ta'mirlab berilishi, transformator ham joriy yil yakuni bilan bartaraf etilishi aytilgan.

Ammo mana kuz kirib kelyaptiki, ishlar boshlanishidan darak yo‘q. Biz Yakkabog‘ tuman hokimligi matbuot xizmati bilan bog‘lanib, bu borada munosabat bildirishlarini so‘radik, hozircha javob bo‘lmadi.

«Elektr muammolariga yechim topilsa, yo‘llarimizga shag‘al to‘kib berishsa bo‘ldi»

Qishloqda ekanmiz, ikki simyog‘och orasidagi sim o‘n joyidan ulanganini ko‘rdik.

«Qishlog‘imiz uchun yangi transformator, simyog‘och va sim tortib berilsa, yo‘llarimizga shag‘al to‘kib berishsa bo‘ldi. Boshqa muammomiz yo‘q», – deydi qishloq ahli.

«Qish kunlari ko‘chamizda yurib bo‘lmaydi, bolalar ko‘chaga chiqolmaydi. Maktabga borishi uchun asfalt yo‘lgacha etik kiyib chiqarib qo‘yamiz, qaytayotganda yana shu... Elektr tokiga biron qimmatroq askunani qo‘shishga qo‘rqamiz, sababi tok muntazam emas, tinimsiz o‘chib-yonib turadi. Hozirdan qish uchun tayyorgarlik ko‘rmasak har yilgi ahvol boshimizga tushadi», deydi ular.

Aytishlaricha, hozirda uzatilayotgan elektr toki faqat bir nechtagina maishiy texnikani ishlatishga, kechasi uyni xira yorug‘ qilishgagina yetadi, xolos. Shu omonat tok ham kuz oylaridan boshlab uzilishlarga uchraydi va qishda qishloq elektr ta'minotisiz qoladi.

Yakkabog‘dagi qishloq muammosiga daxldor mutasaddi tashkilotlar va rahbarlar masalaga befarq bo‘lmaydilar, deb umid qilamiz.

Yigitali Mahmudov,
Kun.uz muxbiri

Mavzuga oid