5 sentyabrdan qator faoliyat turlariga ruxsat beriladi - Maxsus komissiya qarori

Maxsus komissiya axborotiga ko‘ra, karantin cheklovlari yumshatilishiga qaramasdan amalga oshirilgan chora-tadbirlar natijasida koronavirus infeksiyasi tarqalishini jilovlash bo‘yicha muayyan natijalarga erishilmoqda. Xususan, joriy yil 21 avgustdan boshlab koronavirus infeksiyasini yuqtirish bilan bog‘liq yangi holatlar 500 talik ko‘rsatkichdan qat'iy tushganligi, sog‘ayganlar soni 39,5 mingdan yoki umumiy kasallanganlarning 93 foizidan oshgani ham buni tasdiqlamoqda.

2020 yil 5 sentyabrdan boshlab umumiy ovqatlanish obektlari (restoran, kafe, oshxona, choyxona) faoliyatiga ruxsat berildi. Bunda ushbu obektlar quyidagi sanitari talablariga rioya etishi talab etiladi:

• banketlar va boshqa ommaviy tadbirlarni o‘tkazishga yo‘l qo‘ymaslik;
• stollar oralig‘idagi 2 metrdan kam bo‘lmagan ijtimoiy masofani ta'minlash;
• bir stol atrofida 4 kishidan ko‘p bo‘lmagan (oila a'zolari bundan mustasno) mijozlarni joylashtirish;
• xodimlarning tibbiy niqob va tibbiy qo‘lqopda bo‘lishi;
• har bir mijozdan keyin stol va boshqa jihozlarning yuza qismini dezinfeksion vositalar bilan tozalash;
• bino va xonalarga, shuningdek, havo aylantirish tizimiga zararsizlantirish anjomlarini (ultrabinafsha lampalar va b.) o‘rnatish.

Shuningdek, tomosha va madaniy-ko‘ngilochar obektlar (faqatgina teatr va kinoteatr) faoliyatiga ruxsat berildi. Bunda ushbu obektlar quyidagi sanitari talablariga rioya etishi talab etiladi:

• obektning havo aylantirish tizimiga zararsizlantirish anjomlarini (ultrabinafsha lampalar va b.) o‘rnatish;
• tashrif buyuruvchilarni ijtimoiy masofani saqlagan holda joylashtirish hamda tibbiy niqobda bo‘lish (zarur hollarda tadbir 2 soatdan ziyod davom etganda niqobni bepul almashtirish);
• obektlarning kirish-chiqish joylarini pirometrlar, dezinfeksion “to‘shaklar”, antiseptik vositalari bilan jihozlash, ularga kirishda har bir tashrif buyuruvchilarning tana haroratini o‘lchab, 37°C va undan yuqori bo‘lgan yoxud infeksiya alomatlari mavjud bo‘lgan holatda kiritmaslik;
• har bir seansdan keyin o‘rindiq va boshqa jihozlarning yuza qismini dezinfeksion vositalar bilan tozalash;
• xodimlarning tibbiy niqob va tibbiy qo‘lqopda bo‘lishi.

Parklar va istirohat bog‘laridagi attraksionlar faoliyati ham tiklanmoqda. Bunda ushbu obektlar quyidagi sanitariya qoidalariga rioya etishi talab etiladi:

• tashrif buyuruvchilarni ijtimoiy masofani saqlagan holda navbatda turishini ta'minlash;
• attraksionlarning yuza qismini har soatda yoki har bir foydalangandan so‘ng dezinfeksion vositalar bilan tozalash;
• attraksiondan foydalanishda ijtimoiy masofani saqlash;
• xodimlarning tibbiy niqob va tibbiy qo‘lqopda bo‘lishi;
• bino va xonalarga, shuningdek, havo aylantirish tizimiga zararsizlantirish anjomlarini (ultrabinafsha lampalar va b.) o‘rnatish (yopiq binolardagi attraksionlar faoliyati uchun).