23:14 / 09.09.2020
67770
«Ишонч йўқ деганимда юзага чиққан ҳақиқатни кўрдим». Кушербаев гувоҳ сифатида қатнашган суд ишида ҳукм эълон қилинди

«Қўшёғоч олтин файзли балиқлари» МЧЖ раҳбари Жавоҳир Зокиржоновга нисбатан суд ҳукми эълон қилинди. Ушбу жиноят иши суд терговида депутат Расул Кушербаев ҳам гувоҳ сифатида сўроқ қилинганди, деб хабар бермоқда Kun.uz мухбири.

9 сентябрь куни Жиноят ишлари бўйича Оққўрғон туман судининг судьяси ​Жаҳонгир Саидов ишни кўришда давом этиб, томонлар музокара нутқини тинглади.

Давлат айбловчиси Шаҳриёр Бекназов дастлабки тергов органи томонидан судланувчига нисбатан айблов Жиноят кодексининг 167-моддаси 3 қисми «а» бандида кўрсатилган жиноят бўйича тўғри малакаланган, деган хулоса келди.

Шаҳриёр Бекназов

«Судланувчининг жамоат ҳимоячиси ўз нутқларида асосий урғуни Жиноят процессуал кодексининг 325-моддаси («жабрланувчининг шикоятига асосан жиноят иши қўзғатиш») 2-қисмига қаратди. Яъни Жиноят кодексининг 167, 170, 172, 173-моддаларида назарда тутилган ва устав фондида давлат улуши бўлмаган юридик шахсга нисбатан унинг ходими томонидан содир этилган жиноятлар тўғрисидаги жиноят ишлари фақат мазкур юридик шахс раҳбарининг, мулкдорининг ёки ваколатли бошқарув органининг аризасига кўра қўзғатилиши эътироф этилган. 

Агар МЧЖ ходими томонидан жамият мулки талон-торож қилганлик ҳолати аниқланганда, МЧЖ раҳбарияти томонидан ариза берилгандагина жиноят иши қўзғатилиши мумкинлиги билдирилган. Шунинг учун, жамоат ҳимоячисининг эътирози мазкур ишга таалуқли эмас...

Судланувчи Жавоҳир Зокиржонов ўзига нисбатан эълон қилинган айбга дастлабки тергов ва суд мажлисида умуман иқрор эмаслигини билдирса-да, унинг айби ўзининг тушунтириш хати, суд товаршунослик экспертизасининг хулосаси, Тошкент вилояти Экология ва атроф муҳитни муҳофаза қилиш бошқармасининг хулосаси, Тошкент вилояти автомобиллар йўллари ҳудудий бош бошқармаси масъул мутахассиси томонидан тузилган далолатнома ва чизмалари, Б.Дадахўжаевнинг хулосаси ҳамда гувоҳларнинг сўроқ қилиш жараёни, жиноят ишида бошқа тўпланган ҳужжатлар билан ҳам тўлиқ исботини топган, деб ўйлайман», –​ дея музокара нутқини билдирди у.

Давлат айбловчиси суддан судланувчи Зокиржоновга 7 йил муддатга озодликдан маҳрум этиш жазоси тайинланишини сўради. Шунингдек, судланувчидан давлатга етказилган зарар, яъни 600 789 105 сўм пул маблағи ундирилиши сўралди.

Адвокат Умид Давлатов эса фуқаровий даъвогар сифатида кўрсатилган туман ҳокимияти вакиллари судда иштирок этмагани, вакилнинг таъкидланган суммага даъвоси бор ё йўқлиги номаълум эканини билдирди.

«Жиноят процессуал кодексининг 35-моддасида («терговчи»​) жиноят иши бўйича дастлабки тергов прокуратура, ички ишлар органлари ва давлат хавфсизлик хизмати терговчилари томонидан олиб борилиши мумкинлиги қатъий белгилаб қўйилган. Бизнинг ҳолатда эса ушбу жиноят иши Янгийўл туман прокурорининг катта ёрдамчиси томонидан олиб борилган. Шунингдек, ушбу кодекснинг 36-моддасида («терговчининг ваколатлари») терговчи ваколатлари маълум қилинган.

Умид Давлатов

Ушбу жиноят иши юзасидан дастлабки тергов бир томонлама, фақат Жавоҳир Зокиржоновни айблаш мақсадида олиб борилган. Масалан, қачон ва қанча ҳажмда шағал олиб чиқилгани аниқ исботлаб берилмаган. Агар воқеа жойидан шағал олиб чиқилган​ бўлса, ҳеч бир машина ва ҳеч бир шахс жиноят устида қўлга олинмаган. Бу йўналишда умуман тергов ҳаракатлари бўлмаган», – дейди ҳимоячи.

Умид Давлатов ҳимояси остидаги Жавоҳир Зокиржонов дастлабки тергов даврининг жараёнлари видео тасвирга олинмаганига урғу берди. У туман прокуратура биноси камералар билан жиҳозланмагани тўғрисида келтирилган важ ЖПК талабларини бузишга асос бўла олмаслигини билдирди.

Адвокат Давлатов суддан Жавоҳир Зокиржоновга нисбатан оқлов ҳукмини чиқариб, уни дарҳол суд залидан озод этишни сўради.

Жавоҳир Зокиржонов ўз сўзида жиноят иши очилгандан буён процессуал ҳаракатлар бир томонлама юритилганини эътироф этди. У суддан ўзига нисбатан оқлов ҳукм чиқаришини сўради. 

Судья маслаҳат уйида тўпланган далиллар ва суд тергови давомида аниқланган ҳолатлар, гувоҳларнинг кўргазмасини ўрганиб чиқиб, ҳукмни эълон қилди. Унга кўра, Жавоҳир Зокиржоновга нисбатан озодликдан маҳрум этиш билан боғлиқ бўлмаган бошқа жазо тайинланди.

Шунингдек, у давлат фойдасига 42 миллион етказилган зарарни қоплаши белгиланди. Судья ҳукмнинг барча қисмлари бўйича маълумот бериб, томонларга тушунтириш берди.

Суд мажлиси якунига етгач, Жавоҳирнинг онаси Нодира Қўзиева Kun.uz'га интервью бериб, ўз кечинмалари ҳақида гапирди.

«Инсонийлик йўқ, ишонч йўқ деган жойимдан чиққан ҳақиқатни кўрдим. Судья Жаҳонгир Саидовга миннатдорчилик билдираман. Улар адолатли ҳукм чиқарганидан розиман. Яхшилар бор бўлсин», – дейди севиниб Нодира опа.

Жавоҳирнинг ўзи ҳам суд ҳукмидан мамнун эканини билдириб, эндиликда тадбиркорлик фаолиятини давом эттиришини маълум қилди.​

Эслатиб ўтамиз, мазкур жиноят иши доирасида судланувчи Жавоҳир Зокиржонов Янгийўл туман прокурори катта ёрдамчиси Жавоншер Рустамов томонидан руҳий босимга учрагани, прокуратура расмийси ундан Олий Мажлис депутати Расул Кушербаевга қарши кўрсатма беришни талаб қилганини иддао қилганди. Жавоншер Рустамов суд мажлисида буларни инкор қилди.

Алишер Рўзиохунов тайёрлади.

Тасвирчи ва монтаж устаси –​ Нуриддин Нурсаидов

Top