DTM 189 ball olgan abituriyentlar ham kontrakt asosida talaba bo‘lganiga izoh berdi

Davlat test markazining ma'lumot berishicha, Vazirlar Mahkamasining qarori bilan tasdiqlangan xalqaro va respublika olimpiadalari, tanlovlari, musobaqalari g‘oliblar to‘g‘risidagi nizomga muvofiq, xalqaro va respublika tanlovlari g‘oliblariga qo‘shimcha kvota ajratilmaydi.

Qayd etilishicha, respublikada 1-o‘rinni va xalqaro tanlovlarda 1-3-o‘rinni egallagan Olimpiya o‘yinlari, Osiyo o‘yinlari, jahon chempionati va Osiyo chempionatining individual turlarida g‘olib chiqqan akademik litseylar, professional ta'lim muassasalari va umumta'lim maktablarining bitiruvchilari OTMga test sinovlarisiz va qo‘shimcha imtihonsiz qabul qilinadi.

Respublika  va xalqaro tanlovlar, musobaqalarning  jamoa turlari g‘oliblari esa o‘zlarining orasidan OTMga test sinovlarisiz va qo‘shimcha imtihonsiz qabul qilish uchun uch nomzodni belgilaydi.

“Bunday imtiyozga ega abituriyentlar umumiy qabul parametrlari asosida talabalikka qabul qilinadi, ularga qo‘shimcha qabul parametrlari ajratilmaydi.

Ayrim bakalavriat ta'lim yo‘nalishlarida imtiyozga ega bu turdagi abituriyentlar ro‘yxatdan o‘tgan va ularning soni ajratilgan davlat grantlari soniga teng yoki undan ko‘p bo‘lgan. Shuning uchun 189 ball to‘plagan abituriyentlar ham to‘lov-kontrakt asosida talabalikka tavsiya etilgan”, - deb yozmoqda Davlat test markazi.

Eslatib o‘tamiz, kirish imtihonlarining javobi 25 sentabr kuni e'lon qilindi.

Test natijalaridan norozi bo‘lgan abituriyentlar 28 sentyabrdan boshlab apellyatsiya shikoyati yuborishlari mumkin. 56,7 ball va undan yuqori ball to‘plagan, tabaqalashtirilgan to‘lov-kontraktda o‘qish imkonidan foydalanishni xohlagan abituriyentlar 26 sentyabrdan boshlab OTMlarga murojaat etishi mumkin.