Prezidentning 500ga yaqin hujjatlari o‘z kuchini yo‘qotdi. Adliya vazirligida yangi boshqarma tashkil etilmoqda

Farmon bilan prezidentning o‘z ahamiyatini yo‘qotib, ijtimoiy munosabatlarni tartibga solishda ishtirok etmayotgan 500ga yaqin hujjatlari o‘z kuchini yo‘qotgan deb topildi.

Bundan tashqari, Adliya vazirligiga ikki oy muddatda xatlov natijasida aniqlangan Hukumatning 2 mingdan ortiq eskirgan va o‘z ahamiyatini yo‘qotgan qarorlarini qayta ko‘rib chiqib, tegishli hujjatlarni bekor qilish bo‘yicha taklif kiritish vazifasi yuklatildi.

Farmonga asosan, Adliya vazirligi markaziy apparatida 10ta shtat birligidan iborat Tartibga solish ta'sirini baholash boshqarmasi tashkil etilmoqda.

Boshqarmaning asosiy vazifalari quyidagilar etib belgilanmoqda:

• tartibga solish ta'sirini baholashga mas'ul tashkilotlarning tartibga solish ta'sirini baholash bo‘yicha faoliyatini muvofiqlashtirish va ularga uslubiy yordam ko‘rsatish;
• normativ-huquqiy hujjatlar loyihalarini korrupsiyaga qarshi ekspertizadan o‘tkazish hamda aniqlangan korrupsiogen omillarni bartaraf etishga qaratilgan choralar ko‘rish va tavsiyalar ishlab chiqish;
• korrupsiya kelib chiqishiga sharoit yaratayotgan qonunchilikdagi huquqiy bo‘shliqlar, qoidalar va normalarni aniqlash.

Farmon bilan qonunchilikka quyidagi yangiliklar ham kiritiladigan bo‘ldi:

• Oliy Majlis palatalari, Prezident, Vazirlar Mahkamasi hamda mahalliy davlat hokimiyati organlarining individual va tashkiliy xususiyatga ega hujjatlarini ular tomonidan qabul qilinadigan normativ-huquqiy hujjatlardan farqlashning aniq mezonlarini qonun darajasida belgilash;
• yangi tahrirdagi qonun hujjatini qabul qilish o‘rniga yangi qonun hujjatini qabul qilish va bir vaqtning o‘zida amaldagi qonun hujjatini o‘z kuchini yo‘qotgan deb topish amaliyotini joriy etish;
• Prezident va Vazirlar Mahkamasining rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish, tadbirlar o‘tkazish yuzasidan qabul qilingan hujjatlarni tegishli yil yakuni bo‘yicha o‘z kuchini yo‘qotgan deb topish amaliyotini joriy etish;
• eskirgan va o‘z ahamiyatini yo‘qotgan, byurokratik to‘siq va g‘ovlarni aniqlash hamda ularni bekor qilish, shuningdek tarqoq holda tartibga solinayotgan ijtimoiy munosabatlarni tizimlashtirish.

Farmon bilan 2021 yil 1 iyunga qadar barcha amaldagi Oliy Majlis palatalari qarorlari va hokimlarning normativ-huquqiy tusdagi qarorlarini Qonun hujjatlari ma'lumotlari milliy bazasi – lex.uz saytiga kiritish vazifasi qo‘yildi.