Yerevan Armaniston va Tog‘li Qorabog‘ hududi uzra parvozlarni taqiqladi

Armaniston o‘z hududi va Tog‘li Qorabog‘ni parvoz qilinmaydigan hudud deb e'lon qildi. Bu haqda Armaniston mudofaa vazirligi matbuot kotibi Shushan Stepanyan ma'lum qildi.

 Uning so‘zlariga ko‘ra, havo hududlari Armaniston qurolli kuchlarining havo hujumidan mudofaa va Rossiya havo-kosmik kuchlari tomonidan yopilgan.

 Ma'lum qilinishicha, faqat harbiy hamda oldindan e'lon qilingan fuqaro aviatsiyasi parvozigagina  ruxsat beriladi. 

10 noyabrga o‘tar kechasi Ozarboyjon prezidenti Ilhom Aliyev, Armaniston bosh vaziri Nikol Pashinyan va Rossiya prezidenti Vladimir Putin Tog‘li Qorabog‘dagi barcha jangovar harakatlarni to‘liq to‘xtatish haqida uch tomonlama bayonot qabul qildi.

Ushbu bayonotga ko‘ra, Ozarboyjon va Armaniston tomonlari hozirda egallab turgan joylarida qoladi. Tog‘li Qorabog‘dagi tutashuv chizig‘i va hududni Armaniston bilan bog‘lovchi yo‘lak bo‘ylab Rossiyaning tinchlikparvar kuchlari joylashtiriladi.