Daniya parlamentidagi partiyalar mamlakatdagi 15 mln bosh qorako‘zanni yo‘q qilish to‘g‘risidagi qarorni qo‘llab-quvvatladi

Daniya hukumati parlament partiyalari mamlakat fermalaridagi 15 mln bosh qorako‘zanni yo‘q qilish rejasini qo‘llab-quvvatlaganini ma'lum qildi. Bu haqda AR agentligi xabar bermoqda.

Qayd etilishicha, hozircha bu masala bo‘yicha ovoz berish o‘tkazilmagan.

Noyabr boshlarida mamlakat bosh vaziri Mette Frederiksen qorako‘zanlar mutatsiyaga uchragan koronavirus infeksiyasini odamlarga yuqtirishi mumkinligini aytgandi. Kasallik tarqalishining oldini olish maqsadida hukumat mamlakatdagi fermalarda yetishtirilayotgan barcha qorako‘zanlarni yo‘q qilish qaroriga kelgandi. 

 So‘ngra hukumatda bunday vakolat yo‘qligi ma'lum bo‘ldi. Frederiksen uzr so‘radi va bu taklifni parlamentga kiritdi. Qishloq xo‘jaligi vaziri Mogens Yyensenning ma'lum qilishicha, hukumatda yetakchi bo‘lgan sotsial-demokratlar bu masalada yana to‘rtta partiyaning qo‘llab-quvvatloviga ega bo‘lgan.

Oxirgi ma'lumotlarga ko‘ra, Daniyadagi qorako‘zan yetishtiruvchi fermalarning 200dan ortiq ishchisi koronavirus yuqtirgan, 283ta fermadagi jonivorlar koronavirusga chalingan, 265ta fermada barcha jonivorlar yo‘q qilingan. Mamlakatda 1139ta ana shunday ferma faoliyat olib boradi, ularda 6000dan ortiq kishi ishlaydi. Bu fermalar jahon bozoridagi qorako‘zan mo‘ynalarining 40 foizini yetkazib beradi. 

Avvalroq Ispaniya, Italiya, Niderlandiya, Shvetsiya, Gretsiya va AQShdagi qorako‘zan yetishtiruvchi fermalarda koronavirus bilan bog‘liq holatlar qayd etilgandi.