To‘rt viloyatda paxta topshirish bo‘yicha shartnoma majburiyatlari bajarilmadi. Jami hosil o‘tgan yilgidan ko‘p bo‘ldi

Qishloq xo‘jaligi vazirligi O‘zbekistonda 2020 yilda qancha paxta hosili yig‘ib olingani to‘g‘risida ma'lumot berdi. Vazirlik matbuot xizmati xabar qilishicha, respublikada joriy yilda 1 mln 34 ming gektar maydonda g‘o‘za parvarish qilinib, 3 mln 82 ming tonna paxta xomashyosi tayyorlangan, bu esa belgilangan yalpi hosilga nisbatan 99,4 foiz demakdir.

Ma'lum bo‘lishicha, to‘rt viloyatda – Qashqadaryo, Sirdaryo, Buxoro va  Surxondaryoda paxta rejasi bajarilmagan.

Respublikada birinchi bo‘lib rejani bajargan Farg‘ona viloyatining yakuniy ko‘rsatkichi 107,7 foizni tashkil etgan.

Farg‘ona 107,7 foiz;
Xorazmda 106,7 foiz;
Andijonda 106,6 foiz;
Namanganda 105,1 foiz;
Toshkentda 104,4 foiz;
Samarqandda 103,6 foiz;
Qoraqalpog‘iston Respublikasida 102,7 foiz;
Navoiyda 102,7 foiz;
Jizzaxda 100,7 foiz;
Qashqadaryoda 95,8 foiz;
Sirdaryoda 93,5 foiz;
Buxoroda 89,1 foiz;
Surxondaryoda 82,3 foiz.

Paxta yetishtiruvchi 136ta tumandan paxta yig‘im-terimini tizimli tashkil etgan 104tasi, 97 ta paxta-to‘qimachilik klasteridan 78 tasi, 11 ta paxta kooperatsiyasidan 8 tasi hamda 29 mingta fermer xo‘jaligidan 23 mingtasi shartnomani ortig‘i bilan bajargan.

Respublikada har gektar paxta maydonida o‘rtacha hosildorlik 29,8 sentnerni (shartnoma 30,0 ts/ga) tashkil qildi.

Joriy yilda faoliyat yuritgan 97 ta paxta-to‘qimachilik klasterlari tomonidan 927 ming gektar maydondan 2 mln 794 tonna (30,1 ts/ga) va 11 ta kooperatsiya tomonidan 106,6 gektar maydondan 288 ming tonna (27,0 ts/ga) paxta xomashyosi yetishtirilgan.

Ma'lumot uchun, 2019 yilda respublika bo‘yicha 2 million 845 ming tonna paxta xomashyosi tayyorlangandi (reja 2 million 958 ming tonna bo‘lgan).