Surxondaryo viloyati prokuraturasi paxta mavsumida qo‘shib yozish holatlari bo‘lganini rad etdi

2020 yilgi paxta mavsumida qo‘shib yozish holatlari aniqlanmagan, deb bayonot tarqatdi Surxondaryo viloyati prokuraturasi.

Avvalroq, Kun.uz 2020 yilgi paxta terimi mavsumida Surxondaryoda 52 ming tonna paxta qo‘shib yozilgan bo‘lishi mumkinligi, bu – viloyat rejasining 21 foiziga tengligi haqida yozgan edi.

Xabardagi ma'lumotlar Surxondaryo viloyati prokurori o‘rinbosari imzosi bilan tumanlarga yuborilgan № 11/1.1-20 sonli topshiriqqa asoslangan.

Viloyat prokuraturasi bayonotiga ko‘ra, bu topshiriq «kunlik terim pullarining tarqatilishi yuzasidan tegishli tashkilotlardan olingan tahliliy ma'lumotlarga tayanib» tayyorlangan.

Tumanlarga bunday topshiriq «paxta hisob-kitoblariga qo‘shib yozish salbiy holatlarining oldini olish» maqsadida yuborilgan.

«Mazkur topshiriq asosida amalga oshirilgan prokuror nazorati tadbirlari natijasida kelib chiqishi mumkin bo‘lgan paxta mavsumida hisob-kitob masalalarida qo‘shib yozish holatlarining oldi olingan.

Chunonchi, mazkur topshiriq yuborilgan vaqtda paxta mavsumi davom etayotgan bo‘lib, yakuniy hisob-kitoblar hali tamomlanmagan edi.

Hozirgi kunda paxta mavsumida qo‘shib yozish holatlari bo‘yicha aniqlangan va isbotlangan holatlar mavjud emas», – deyiladi Surxondaryo viloyati prokuraturasi rasmiy relizida.

Eslatib o‘tamiz, Kun.uz ixtiyoriga kelib tushgan xat 30 oktabr sanasiga taalluqli bo‘lib, unda shunday yoziladi: «Tahlillar viloyat bo‘yicha jami 52 121 tonna paxta xomashyosini qo‘shib yozish holatlariga yo‘l qo‘yilganini ko‘rsatmoqda».

Qishloq xo‘jaligi vazirligi ma'lumotiga ko‘ra, Surxondaryo viloyati paxta rejasini bajarish bo‘yicha eng past ko‘rsatkichni qayd etgan. Viloyatda belgilangan reja 82,3 foizga bajarilgan.