PFL Farg‘onadagi janjalli o‘yin bo‘yicha bayonot berdi. Hakam mojaroli vaziyatda to‘g‘ri qaror chiqargan

Bayonotda muxlislar va «Neftchi» futbolchilari tomonidan kaltaklangan hakamlarning holati bo‘yicha ma'lumot berilgan: ularning salomatligi yaxshi. PFL hakamlarning o‘yinda tortishuvlarni yuzaga keltirgan uchta qarorini alohida tahlil qilib, barcha qarorlar to‘g‘ri bo‘lganini ma'lum qildi. Hakamlar o‘yinni boshqargani uchun 8,3 ball (yaxshi) olgan.

«Neftchi» – «Turon» uchrashuvi kutilganidek shiddatli kechdi va unda mehmonlar 1:0 hisobida g‘olib chiqib, Superliga yo‘llanmasini qo‘lga kiritdi. Bahs yakunida hakamlarga nisbatan «Neftchi» futbol klubi futbolchilari hamda muxlislarining tajovuzkor xatti-harakatlari kuzatildi, maydonda tartibsizlik vujudga keldi. Ichki ishlar organlari xodimlarining sa'y-harakatlari sabab ko‘ngilsiz holat tezda bartaraf etildi.

Shu kuni bellashuvni tomosha qilish uchun Farg‘ona viloyati hokimi Xayrulla Bozorov, shuningdek, viloyatning bir qator mansabdor shaxslari «Istiqlol» stadioniga tashrif buyurgandi. Ko‘ngilsiz voqeaning tezlikda bartaraf etilishida ularning hissasi katta bo‘ldi. Bellashuv yakunida viloyat hokimi «Turon» futbolchilarini taqdirlash uchun maydonga chiqdi.

Bunga qadar tez tibbiy yordam xodimlari uchrashuv hakamlariga yordam ko‘rsatdi hamda ularning holatlarini tekshiruvdan o‘tkazdi. Shu kuni hakamlar brigadasi va uchrashuvda bevosita ishtirok etgan shaxslarning og‘ir tan jarohati olishi holati kuzatilmadi. Bugun, 2 dekabr kuni uchrashuv rasmiylari O‘zPFL vakillari bilan birgalikda Toshkentga qaytib keldi, ayni vaqtda ularning salomatliklari bilan bog‘liq muammo yo‘q.

O‘FA Hakamlar va nazoratchilar bo‘limi ekspertlari uchrashuvni o‘rganib chiqdi. Uning burilish nuqtalari asosan uch vaziyatda yuz bergan:

– 14-daqiqada bosh hakam mezbonlar darvozasiga penalti belgiladi. Hakam vaziyatga yaqin bo‘lgani uchun haqli ravishda 11 metrlik jarima zarbasi belgiladi;

– 45-daqiqada to‘p «Turon» futbolchisining qo‘liga tekkandek tuyuldi. O‘rganishlar shuni ko‘rsatdiki, hakam jarima belgilamay to‘g‘ri qaror qabul qilgan. Sababi to‘p futbolchining tana qismiga tekkan;

– 90-daqiqada to‘p yana bir bor «Turon» futbolchisining qo‘liga tekkandek tuyuldi. Takroriy lavha esa to‘p futbolchining ko‘krak va yelka qismiga tekkanini ko‘rsatdi. Qolaversa, bu yerda himoyachining qo‘li tabiiy holatda turgandi. Hakamning bu qarori ham to‘g‘ri bo‘ldi.

Shundan kelib chiqib, uchrashuvni yaxshi boshqarib borgan hakam 8,3 ballga loyiq ko‘rildi, uning harakatlari yaxshi baholandi. O‘zPFL bellashuvdagi provakatsion harakatlarga uchmay, murakkab o‘yinni boricha boshqarib borgan hakamlar brigadasiga o‘z minnatdorligini bildiradi. Shuningdek, bugun O‘zPFL mazkur ishni tegishli qo‘mitalarda o‘rganib chiqish hamda aybdorlarni jazolashni so‘rab, ishni O‘FAga oshirdi.

Kechagi kunning o‘zida O‘zPFL rasmiylari Farg‘ona viloyati IIBB vakillari bilan muloqotda bo‘ldi hamda qonunchilik asosida ularni qiziqtirgan barcha savollarga javob qaytardi. O‘yindan keyin o‘zini noprofessionallarcha tutgan mezbonlar vakillari va buning oqibatida taqiqlangan hududni kesib o‘tgan futbol muxlislari bilan viloyat IIBB shug‘ullanmoqda. Ayni vaqtda O‘FA tegishli qo‘mitasida ham, IIBBda ham ishni o‘rganish uchun yetarlicha dalillar mavjud», – deyiladi bayonotda.

Ma'lumot uchun, Superliga yo‘llanmasi uchun hal qiluvchi o‘yin bo‘lgan «Neftchi» – «Turon» uchrashuvidan keyin «Neftchi» futbochilari va muxlislari bosh hakam Shavkat Nasibullayevga tashlanib ketishdi. «Neftchi» futbolchisi Jamshid To‘raqulov butsasining tag qismi bilan hakamni tepib, maydonga qulatgan va aynan shu harakatdan keyin janjal avj olgan. Biroq bu futbolchiga hech qanday chora ko‘rilmagan va u o‘yindan keyin jamoa bilan birga ketgan. O‘yindan keyin 5 kishi 15 sutkaga qamalgan. 6 kishiga nisbatan jinoyat ishi ochilgan.

O‘yin yakuniga ko‘ra Yaypanning «Turon» klubi Pro-Liga chempioni sifatida O‘zbekiston yuqori divizioni – Superligaga yo‘llanma oldi. «Neftchi»da esa hamon yuqori divizionga chiqish uchun imkoniyat bor. Bu uchun jamoa Superliganing 13-o‘rinni olgan jamoasini o‘tish o‘yinida mag‘lub etishi kerak.