«Kamchiliklar aniqlandi, vazirlik hisob beradi» – Senat ishchi guruhi svet va gaz muammosini o‘rganib qaytdi

«Noyabr oyi oxirida havo harorati sovib ketishi munosabati bilan aholidan juda ko‘plab murojaatlar kelib tushgani tufayli Senatda 3 ta guruhdan iborat ishchi guruh tuzildi. Birinchi guruhga men o‘zim rahbar bo‘ldim. Biz vodiy viloyatlari bilan tanishdik. Turli vazirliklardan rahbar xodimlar ham birga borishdi. 9 kishidan iborat guruh Namangan, Andijon va Farg‘ona viloyatlarini atroflicha o‘rgandik. Fuqarolar bilan uchrashdik. Barcha shifoxonalar, maktab, bog‘chalar va tug‘ruqxonalarga kirib, elektr va gaz ta'minoti bilan tanishdik. Stansiyalarga borib mahallalarga ko‘mir tarqatilishi, narxlar saqlanishi qay darajadaligi, avtomobillar bilan ta'minlanish holatini ham o‘rgandik.

Xalqning gaz va tok yo‘qligi bo‘yicha murojaatlari asosli bo‘lgan. Ko‘p kamchiliklar aniqlandi. Bizning guruh nomi «Ishchi guruh» edi. U yerga o‘rganish uchungina borilgan va biz jarayonni o‘rgandik.

Huddi shunday guruhlar Qashqadaryo, Samarqand va Toshkent viloyatlari bo‘yicha o‘rganishlar o‘tkazishdi. Hujjatlarni Senatga topshirdik.

Senat hozir aniqlangan kamchiliklar bo‘yicha choralar ko‘ryapti. Kelayotgan haftada bo‘ladigan Senat yig‘ilishida bu masala batafsil eshitiladi. Ya'ni Energetika vazirligi axborot beradi.

Qishni kutib olishga va undan yaxshi chiqishga tayyormiz deyilgan edi, nega endi birdaniga sovuq tushganda xalq bunday qiyin ahvolga tushib qoldi, degan masalalar qo‘yildi. Bu eshitish ochiqdan ochiq, to‘g‘ridan to‘g‘ri efirda xalqqa ko‘rsatiladi», — dedi qo‘mita raisi.

Avvalroq, Senat tomonidan Farg‘ona vodiysi viloyatlarida tabiiy va suyultirilgan gaz, ko‘mir hamda elektr energiyasi bilan ta'minlash holatini o‘rganish bo‘yicha ishchi guruhi tuzilgani xabar qilingandi.

25 noyabr kuni o‘tkazilgan matbuot anjumanida energetika vaziri Alisher Sultonov kuz-qish mavsumiga yetarlicha tayyorgarlik ko‘rilganini ta'kidlab, svet va gaz ta'minoti bo‘yicha muammolarni avvalgi yillarda shu yil noyabr oyidagidek vaziyat oldin kuzatilmagani bilan izohlagandi.