«JSTga a'zolikni tezlashtirish lozim» - Bobur Bekmurodov O‘zbekistonning ayrim mahsulotlariga Rossiyada taqiq qo‘yilgani haqida

Oliy Majlis deputati, «Yuksalish» umummilliy harakati raisi Bobur Bekmurodov Rossiya tomonidan O‘zbekistonning bir qator mahsulotlariga taqiqlar joriy etilganiga munosabat bildirdi.

«Rosselxoznadzor» tomonidan virus aniqlangani vaji bilan Farg‘ona, Navoiy va Qashqadaryo viloyatlarida yetishtirilgan qishloq xo‘jaligi mahsulotlariga import taqiqining qo‘yilishi respublika eksport hajmlariga jiddiy ta'sir o‘tkazmaydi.

Ammo, bugun dunyodagi geosiyosiy va geoiqtisodiy jarayonlar o‘zgaruvchan xarakterga ega. Bunday harakatlar tashqi bozorlarimizni diversifikatsiyalashga jiddiy e'tibor qaratish va Jahon savdo tashkilotiga a'zolikni tezlashtirish lozimligini yana bir bor eslatmoqda», – deb yozdi Bekmurodov Telegram'dagi kanalida.

Eslatib o‘tamiz, «Rosselxoznadzor» 26 noyabrdan boshlab Farg‘ona viloyatidan Rossiyaga pomidor va qalampir import qilishni taqiqladi. Bunga sabab sifatida Farg‘onadan olib kelingan bu ikki mahsulotda pomidorning jigarrang burishish virusi (Tomato brown rugose fruit virus) topilgani aytildi.

27 noyabrda «O‘zdavkarantin» inspeksiyasi ushbu virus O‘zbekiston hududida hozirga qadar biror marta aniqlanmaganini ma'lum qildi.

O‘z navbatida, O‘zbekiston Investitsiyalar va tashqi savdo vazirligi ToBRFV virusi YeOIIning karantinli organizmlar reyestrida yo‘qligiga e'tibor qaratdi.

7 dekabr kuni «Rosselxoznadzor» Farg‘ona viloyatidan import qilinadigan barcha o‘simlik mahsulotlariga taqiq kiritdi. Bunga ushbu hududdan keltirilgan 1 tonna quritilgan o‘rikda 2ta lichinka shaklidagi kaper qo‘ng‘izi topilgani vaj sifatida keltirildi.

Kun.uz manbasining ta'kidlashicha, kaper qo‘ng‘izi ham shu paytgacha O‘zbekiston hududida aniqlanmagan.

9 dekabrga kelib, Rossiya tomoni Navoiy va Qashqadaryo viloyatlaridan import qilingan qalampir va pomidor importini ham taqiqlayotgani ma'lum bo‘ldi. «Rosselxoznadzor» bu ikki hududdan olib kelingan pomidor va qalampirda ham pomidorning jigarrang burishish virusini topgan.

Telegram'dagi «davletovuz» kanali muallifi ushbu voqealarni O‘zbekiston Rossiyaning koronavirusga qarshi vaksinasini sotib olishga shoshilmayotgani bilan bog‘ladi.

«Aftidan, O‘zbekiston hukumati Rossiya vaksinasini rasman (xuddi Qozog‘iston kabi) sotib olmayotgani yoki «mahalliylashtirmayotgani» tufayli O‘zbekiston qalampiri, pomidori Rossiya tomonidan turli taqiqlarga, axboriy xurujlarga uchramoqda», – deya munosabat bildirdi bloger.

Iqtisodchi Otabek Bakirov jarayonni «Rosselxoznadzor» keng front bo‘ylab hujumga o‘tmoqda», deya ta'rifladi.

Bir necha kun oldin, Rossiya Veterinariya va fitosanitariya federal xizmati mamlakatga Ozarboyjondan kirib keladigan pomidor va olma, Turkiyaning Antaliya va Izmir viloyatlaridan import qilinadigan pomidor va qalampirni ham taqiqlagan.