Angliyada koronavirusning yuqumliroq turi paydo bo‘ldi 

Britaniya sog‘liqni saqlash vaziri Mett Xenkokning ta'kidlashicha, virusning yangi turi bir necha kun avval aniqlangan va virusning Angliya janubi-sharqida tez tarqalayotgani bilan bog‘langan bo‘lishi mumkin. Dastlabki tadqiqotlar yangi shtamm avval ma'lum bo‘lgan shtammlardan tezroq tarqalishini ko‘rsatgan. 

Xenkokning ta'kidlashicha, ayni vaqtda Angliya janubidagi 60ta turli hududda virusning yangi shtammi bilan mingga yaqin kasallanish holati qayd etilgan va ular soni tobora ko‘paymoqda.

Shu bilan birga, olimlarda virusning yangi mutatsiyasi infeksiyaning og‘ir kechishiga olib kelishi hamda koronavirusga qarshi ishlab chiqilayotgan vaksinalar unga beta'sir bo‘lishi mumkin deb hisoblashlari uchun asos yo‘q. Biroq olimlar yangi shtamm tezroq tarqalayotgani sababli yuqumliroq ekanini tan olishgan.

“JSST bu haqida ogohlantirildi. Oxirgi vaqtda koronavirusning bunday variantlari Yevropaning boshqa davlatlarida ham qayd etilgandi”, deb qo‘shimcha qilgan Britaniya sog‘liqni saqlash vaziri. 

London, Esseks va Xartfordshir grafliklarida hamda Angliyaning janubidagi bir qator boshqa hududlarda koronavirusga chalinish holatlari keskin ko‘paygani sababli yangi qat'iyroq choralar kiritiladi. Ular 10 mlnga yaqin odamni qamrab oladi.