«O‘zAtom» rus elchisining AES haqidagi gaplarini rad etdi. Hali kelishuvga erishilmagan

O‘zbekiston va Rossiya rasmiylari O‘zbekistonda birinchi atom elektr stansiyasini qurish bo‘yicha asosiy shartnoma yuzasidan muzokaralarni davom ettirmoqda.

«O‘zAtom» agentligi, Rossiyaning Toshkentdagi elchisi Vladimir Tyurdenevning gaplariga javoban, shunday bayonot bilan chiqdi.

Avvalroq elchi AES bo‘yicha shartnoma «deyarli tayyor» ekani va masalaning faqat texnik jihatlari qolgani haqida gapirgandi.

«Hozirda O‘zbekiston Respublikasi va Rossiya Federatsiyasi tomonidan tashkil etilgan ishchi guruhlar tomonidan O‘zbekiston Respublikasida atom elektr stansiyasini qurish bo‘yicha asosiy shartnoma shartlarini muhokama qilish bo‘yicha doimiy muzokaralar o‘tkazib kelinmoqda.

Ushbu shartnomani muhokama qilishda O‘zbekiston Respublikasining milliy manfaatlarini inobatga olgan holda muzokara pozitsiyalari ishlab chiqilgan va himoya qilib kelinmoqda.

Hozirda tomonlar loyihaning xavfsizligi va ishonchliligi hamda iqtisodiy samaradorligini oshirish, shuningdek respublikaning milliy manfaatlaridan kelib chiqqan holda pozitsiyalarini yaqinlashtirish bo‘yicha muzokaralarni davom etmoqdalar.

Bundan tashqari, AESni joylashtirish maydonchasiga tegishli ruxsatnoma olish maqsadida obektni joylashtirish bo‘yicha ustuvor maydonchada keng ko‘lamli muhandislik tadqiqot ishlari amalga oshirilmoqda va AES qurilishi hamda undan foydalanishning atrof muhitga ta'sirini baholash bo‘yicha hujjat ishlab chiqilgan bo‘lib, ushbu hujjat bo‘yicha o‘rnatilgan tartibda ekspertizadan o‘tkazish hamda jamoatchilik eshittiruvlarini tashkil etish bo‘yicha rejaga asosan ishlar olib borilmoqda.

Tanlangan maydonchada Rossiya tomoni bilan hamkorlikda amalga oshirilayotgan muhandislik tadqiqot ishlari natijalari AES qurilishi bo‘yicha shartnoma shartlarining asosi bo‘lib xizmat qiladi», – deyiladi «O‘zAtom» bayonotida.

Eslatib o‘tamiz, shu kunlarda rus elchisi Vladimir Tyurdenev O‘zbekiston Rossiyaning «Sputnik V» vaksinasidan 1 mln doza buyurtma bergani haqida ham xabar tarqatdi. Ammo bu ma'lumotni hozircha rasmiy Toshkent tasdiqlagani yo‘q.

Elchining gaplariga qaraganda, O‘zbekiston ushbu 1 mln doza vaksinadan Rossiyaga ishlagani boradigan fuqarolarini emlash uchun foydalanadi. Qayd etish lozim, Rossiya Qozog‘iston va Qirg‘iziston fuqarolaridan farqli o‘laroq, O‘zbekiston fuqarolari uchun hamon chegaralarini ochmayapti.

O‘zbekiston rasmiylari Rossiya bilan qatnovlarni tiklashga tayyorligi va ikkinchi tomon bilan muzokaralar olib borayotgani bundan uch oy oldin ma'lum bo‘lgan edi.