«Cheklovlar «Milliy elektr tarmoqlari» AJ tomonidan joriy etilmoqda», Qashqadaryo HETK Chiroqchida 16 soatgacha chiroq o‘chirilayotganiga munosabat bildirdi

Kecha, Kun.uz saytida «Chiroqchida bir sutkada 16 soatgacha chiroq o‘chirilayotgani ma'lum qilindi» sarlavhasi bilan O‘zbekiston iste'molchilar huquqlarini himoya qilish jamiyatlari federatsiyasi tomonidan Chiroqchi tumanida o‘tkazilgan monitoring natijalari e'lon qilingan edi.

Bugun «Qashqadaryo hududiy elektr tarmoqlari» AJ matbuot xizmati shu xabarga munosabat bildirdi. Unda yozilishicha, «Milliy elektr tarmoqlari» AJga qarashli dispetcherlik xizmatlari tomonidan Yakkabog‘-1, Yakkabog‘-2, Shahrisabz yuqori kuchlanishli havo elektr uzatish tarmoqlarini cheklashga o‘chirilishi yoki avariyaga qarshi avtomatika tizimlarini ishga tushishi oqibatida Chiroqchi tumani elektr ta'minotida cheklovlar yuzaga kelgan.

«Kun.uz saytida «Chiroqchida bir sutkada 16 soatgacha chiroq o‘chirilayotgani ma'lum qilindi» sarlavhali O‘zbekiston iste'molchilar huquqlarini himoya qilish jamiyatlari federatsiyasi matbuot xizmati xabari e'lon qilindi.

Ushbu holat yuzasidan quyidagilarni ma'lum qilamiz:

Yagona energetika tizimida quvvat tanqisligi holatlari yuzaga kelganligi sababli yagona energetika tizimida turg‘un ish rejimini saqlash, sodir bo‘lishi mumkin bo‘lgan avariyalarning oldini olish maqsadida «Milliy elektr tarmoqlari» AJga qarashli dispetcherlik xizmatlari tomonidan yuqori kuchlanishli havo elektr uzatish tarmoqlarida elektr energiyasini cheklash holatlari kuzatilmoqda.

Buning oqibatida viloyatimizdagi ayrim iste'molchilarni elektr energiyasi bilan ta'minlash imkoni bo‘lmayapti. Xususan, Yakkabog‘-1, Yakkabog‘-2, Shahrisabz yuqori kuchlanishli havo elektr uzatish tarmoqlarini «Milliy elektr tarmoqlari» AJga qarashli dispetcherlik xizmatlari tomonidan cheklashga o‘chirilishi yoki avariyaga qarshi avtomatika tizimlarini ishga tushishi oqibatida Chiroqchi tumani elektr ta'minotida cheklovlar yuzaga kelgan.

Elektr ta'minotida cheklovlar kuzatilayotgani va uning sabablari yuzasidan Energetika vazirligi va boshqa mutasaddi tashkilotlar tomonidan OAV orqali tegishli izohlar berilgan. Shunday bo‘lsada, elektr ta'minoti bo‘yicha bildirilayotgan e'tiroz va noroziliklarni bartaraf etish maqsadida «Qashqadaryo hududiy elektr tarmoqlari» AJ tomonidan viloyatimizga o‘rnatilayotgan elektr energiyasi yetkazib berish limitlarini oshirishga amaliy yordam so‘rab mutasaddi tashkilotlarga murojaat etib kelinmoqda», deyiladi munosabatda.