Namanganda to‘la qurib bitkazilmagan piyodalar ko‘prigi quladi

{Yii::t(}

O'tkazib yuborish 6s

O'tkazib yuborish

Namangan shahar Davlatobod tumanidagi O‘n bir Ahmad ziyoratgohini turizm obektiga aylantirish maqsadida 2020 yil dekabrida Shimoliy Farg‘ona kanali ustida piyodalar ko‘prigi qurila boshlangan edi.

37 metrlik ko‘prik qurilish ishlari oxiriga yetmasdan, 8 yanvar kuni o‘rtasidan bo‘linib, suvga qulagan.

«Namangan ko‘priklardan foydalanish» UK rahbari Sanjarbek Shodmonovning Kun.uz muxbiriga ma'lum qilishicha, qulab tushgan ko‘prik ziyoratgoh uchun tadbirkor tomonidan, homiylik asosida qurilgan.

«Ko‘prigimiz O‘n bir Ahmad ziyoratgohini obodonlashtirish jarayonida mahalliy tadbirkorimiz tomonidan, homiylik yordami sifatida, aholining uzog‘ini yaqin qilish maqsadida qurilayotgan edi. Hech qanday davlat budjeti mablag‘i sarflanmagan», – dedi u.

Namangan viloyat hokimligi bergan ma'lumotga ko‘ra, ko‘prikni tadbirkor Ma'rufxon Hojixonov yaqinda 90 yoshida qazo qilgan otasining vasiyatini ro‘yobga chiqarish uchun qurgan.

«Dadamning vasiyatlariga ko‘ra, O‘n bir Ahmad ziyoratgohiga keladiganlar qiynalmasligi uchun shu ishga qo‘l urgandim. Ko‘prik tayyor bo‘lganidan keyin shu atrofdagi avtoturargohda bir hafta 5 tonnadan oshiq yuk qo‘yilgan holatda turdi, qilt etmadi. Keyin joyida sinab ko‘rdik. Havo harorati pasayib, kanaldagi suv oqimi ko‘paygani sababli hali ishimiz oxiriga yetmagan edi», – deydi Ma'rufxon Hojixonov.

Tadbirkorning aytishicha, ko‘prikning montaj ishlari to‘liq yakunlanmagan, ikki tomoniga yana tros va temir o‘rnatiladi.

«Namangan ko‘priklardan foydalanish» UK rahbari Sanjarbek Shodmonov bergan ma'lumotga ko‘ra, ziyoratgoh avtoturargohini asfaltlash uchun 970 million so‘m, unga borish yo‘llarini asfaltlash uchun 1,2 milliard so‘m atrofida mablag‘ rejalashtirilgan.