«O‘zbekistonda qog‘ozdagi tenderlar erasi tugadi» – moliya vaziri o‘rinbosari Odilbek Isoqov

Tanlov va tenderlar o‘tkazishdagi ochiqlik va shaffoflikni ta'minlash maqsadida joriy yildan boshlab, tenderlar to‘liq elektron shaklda o‘tkaziladi. Bu haqda Moliya vazirining o‘rinbosari Odilbek Isoqov Xalqaro press-klub sessiyasida ma'lumot bergan.

Odilbek Isoqovga ko‘ra, davlat tashkilotlari xarajat va daromadlaridagi ochiqlikni ta'minlash maqsadida yangi tahrirdagi «Davlat xaridlari to‘g‘risida»gi qonun loyihasi tayyorlanib, muhokama uchun parlamentga  yuborildi. Endilikda korporativ buyurtmachilarning xaridlarini ham ochiq axborot portaliga joylashtirib borish reja qilinyapti.

2020 yil 29 dekabrdagi Prezident Shavkat Mirziyoyevning parlamentga murojaatnomasida davlat xaridlarida atigi 4 foiz tadbirkor qatnashayotgani, kelgusi yilda 24ta yirik davlat korxonasiga davlat xaridi bo‘yicha ochiq-oshkora talablar joriy etilishi ma'lum qilingandi.

2021 yilda ilk tashkil etilgan yalpi majlisda ham Senat raisi davlat xaridlari sohasidagi korrupsion holatlar va shu kabi muhim masalalarda Korrupsiyaga qarshi kurashish agentligining faoliyatini tanqid qilgan, parlamentda agentlikning hisobotini doimiy tarzda eshitib borish tizimini yo‘lga qo‘yishni taklif etgandi.

Yangi tahrirdagi «Davlat xaridlari to‘g‘risida»gi qonun loyihasi 8 oktyabr kuni parlamentga kiritilgan. Moliya vazirligi boshqarma boshlig‘i Gulnora Rahimova esa qonun loyihasida nazarda tutilgan o‘zgarishlar va yangiliklar haqida Kun.uz'ga gapirib bergandi.