«Mahkumlarga bu borada cheklovlar yo‘q» - Qamoqxonalarda 2016 yildan namoz o‘qish va ro‘za tutishga ruxsat berilgani ma'lum qilindi

O‘zbekiston qamoqxonalarida mahkumlarning diniy huquq va erkinliklari borasidagi cheklovlar Shavkat Mirziyoyev hokimiyatga kelgan kunlardan bekor qilingan. Bu haqda Jazoni ijro etish bosh boshqarmasi Tarbiyaviy va ijtimoiy psixologik ishlarni tashkil etish boshqarmasi boshlig‘i, podpolkovnik Jamshid Sultonov ma'lum qildi.

{Yii::t(}

O'tkazib yuborish 6s

«O‘zbekiston qonunchiligida bunaqa toifadagi mahkumlar mavjud emas. Ularning barchasi qonun oldida barobar.

Agar diniy ekstremistik oqimlar yoki diniy tashkilotlar tomonidan konstitutsiyaviy tuzumga qarshi jinoyat sodir etib, qamalgan mahkumlar nazarda tutilayotgan bo‘lsa, bugungi kunda mahkumlar o‘rtasida hech qanday cheklovlar yo‘q.

Mahkumlar jazoni ijro etish muassasalarida bemalol o‘zlarining ibodatlari bilan shug‘ullanishlari mumkin, faqat kun tartibini buzmagan holda. Chunki JIEMlarda faqatgina islom diniga mansub mahkumlar jazoni o‘tamaydi», dedi IIV mas'uli vazirlik Jazoni ijro etish bosh boshqarmasi mutasaddilari ishtirokida «Jazoni ijro etish muassasalari faoliyatining joriy holati va istiqboldagi vazifalar» mavzusida matbuot anjumanida.

Jamshid Sultonov mahkumlarning diniy huquq-erkinliklari qachondan boshlab ta'minlana boshlagani haqida ham gapirdi.

«Ochig‘ini aytish kerak, oldin bunday taqiqlar bor edi. Buni inkor etmaymiz. Hozir ochiq va shaffof davrida ishlayapmiz. O‘zbekiston Respublikasining eng yangi tarixini boshlab bergan Shavkat Mirziyoyev davlat rahbari sifatida saylangan kunlardan boshlab bu kabi cheklovlarning barchasi bekor qilingan. Mahkumlar o‘zi xohlagan dinga e'tiqod qilishi mumkin yoki ularning e'tiqod qilmaslik huquqi ham to‘liq kafolatlangan», deya uning so‘zlarini keltirmoqda Kun.uz muxbiri.

#namoz #qamoq #ro‘za #diniy erkinlik #Jamshid Sultonov