2021 yil ichimlik suvi va kanalizatsiya tarmoqlari tortish uchun 1,1 trln. so‘m ajratiladi

2021 yil barcha dasturlarning moliyaviy manbalari hisobidan 1,1 trln. so‘m mablag‘lar o‘zlashtirilishi natijasida 1,8 ming km ichimlik suv va kanalizatsiya tarmoqlari tortilib, 118 ta obektlar quriladi.

Xalqaro moliya institutlarining 250 mln. AQSh dollar miqdorida imtiyozli kredit mablag‘lari hisobidan ichimlik suv ta'minoti bo‘yicha 283 km magistral hamda 539 km tarmoqlar, 26 ta suv inshootlari, 4 ta suv rezervuarlari va 3 ta suv minorasi qurilib, rekonstruksiya qilinadi.

Oqova suv tizimlari bo‘yicha 13 ta oqova suv tozalash inshooti, 186 km kollektorlar hamda 79 km oqova suv tarmoqlari, 15 ta oqova suv nasos stansiyalari quriladi va rekonstruksiya qilinadi. Respublika budjetidan 70 mlrd. so‘m hisobidan 88 dona va MChJlarning 48 mlrd. so‘m mablag‘lari hisobidan 60 dona maxsus texnikalar xarid qilinadi.

O‘zbekistonda ichimlik suvi va oqova suv xizmatlarining yangi narxlari o‘rtacha 1,9 foizga oshib, yangi talablar asosida ichimlik suv ta'minoti xizmatlari uchun yangi tariflar tasdiqlandi. Mazkur tariflar (391 mlrd so‘m) hisobidan quyidagi ishlar amalga oshiriladi:

• Ichimlik suvini har bir xonadongacha kirib borishini ta'minlash uchun 135 ming ko‘cha kolonkasidan foydalanuvchi aholi xonadonlariga tarmoq tortiladi;
• 400 km yangi tarmoqlar tortilib, 1,1 ming km joriy va mukammal ta'mirlanadi;
• 5 mingta inshoot va tarmoqlarga zamonaviy suv hisoblagichlari o‘rnatiladi;
• 135 ming nafar ko‘cha kolonkasidan foydalanuvchi aholi xonadonlariga tarmoq tortiladi;
• 938 dona energotejamkor nasoslar xarid qilinib, 973 dona nasoslar ta'mirlanadi;
• 165 dona maxsus texnikalar xarid qilinadi;
• 188 dona quyosh panellari o‘rnatiladi.

Mazkur ishlar natijasida suv yo‘qotishlar 10 foizgacha kamayishi aytildi.

«Isroilning «Maya» kompaniyasi va «Toshkent suv ta'minoti» MChJ o‘rtasida shartnoma imzolanib, kompaniyaning maxsus dasturi sun'iy yo‘ldosh orqali Toshkent shahri ichimlik suv quvurlarida yer ostida ko‘zga ko‘rinmaydigan nosozliklar borligi aniqlanib, o‘z vaqtida bartaraf etish yo‘lga qo‘yildi. Bu esa o‘z navbatida ichimlik suv yo‘qotishlarini oldini olishda katta yordam bermoqda», dedi «O‘zsuvta'minot» mutasaddisi.

Bundan tashqari shahar ko‘chalari arxitekturaviy qiyofasiga shikast yetkazmasdan ichimlik suv quvurlarini mukammal ta'mirlash yoki reabilitatsiya qilish bo‘yicha transheyasiz usulda qurilish ishlarini amalga oshirish uchun texnika xarid qilish bo‘yicha ham shartnoma tuzilgani aytildi.