Andijonda kadastr sohasidagi jinoyatlarning 70 foizdan ko‘prog‘i sobiq xodimlar tomonidan sodir etilgan

Andijon shahridagi Digital City texnoparkida o‘tkazilgan matbuot anjumanida Kadastr agentligi viloyat boshqarmasi boshlig‘i Fayoziddin Berdiqulov sohadagi korrupsiya va firibgarlik holatlari haqida ma'lumot berdi, deb xabar bermoqda Kun.uz muxbiri.

Berdiqulovga ko‘ra, sohadagi korrupsiya va firibgarlik holatlarining aksariyat qismi sobiq xodimlar tomonidan sodir etilmoqda. Oxirgi 3 yil davomida viloyatda kadastr sohasiga aloqador 8 ta korrupsiya va firibgarlik holatlari aniqlanib, intizomiy choralar qo‘llanilgan.

«Korrupsiya holatlarining 70 foizdan ko‘prog‘i sobiq kadastr xodimlari tomonidan sodir etilgan. Masalan, joriy yilning 5 yanvar kuni sobiq xodimimiz 5 ming dollar bilan qo‘lga tushgan. Uning hujjatlarini ko‘tarsak, 2020 yil 25 iyunda Mehnat kodeksining 100-moddasi bilan ishdan bo‘shatilgan ekan», – dedi boshqarma boshlig‘i.

Uning aytishicha, fuqarolarning yer olish tartibi va kadastr hujjatlarini qay tartibda rasmiylashtirishni yaxshi bilmasligi sohada tovlamachilik holatlarining saqlanib qolayotganiga sabab bo‘lmoqda.

Ma'lum qilinishicha, o‘tkazilgan nazorat tadbirlari davomida qonun buzilishiga yo‘l qo‘ygan 14 nafar xodimga nisbatan intizomiy choralar qo‘llanilgan.

Eslatib o‘tamiz, 2020 yil 1 yanvardan boshlab tajriba-sinov tariqasida Toshkent shahri va Toshkent viloyatida ko‘chmas mulk bo‘yicha kadastr muhandisi instituti joriy etilgan.

Avvalroq, «Kadastr ishlarini bajarish sohasida davlat organlari funksiyasini xususiy sektorga o‘tkazish to‘g‘risida»gi qaror loyihasi jamoatchilik muhokamasi uchun e'lon qilingan edi.