O‘zbekiston fuqarolari ham mamlakat ichida turistik yig‘im to‘laydigan bo‘ldi

Ichki va ziyorat turizmini rivojlantirishga oid prezident farmoni e'lon qilindi.

Farmonga asosan, 2021 yil 1 martdan boshlab, O‘zbekiston fuqarolari va O‘zbekistonda doimiy yashovchi fuqaroligi bo‘lmagan shaxslardan joylashtirish vositasida, ular yashagan har bir kun uchun turistik (mehmonxona) yig‘im undiriladi.

Yig‘im miqdorini Vazirlar Mahkamasi belgilaydi.

Ma'lumot uchun, ayni paytda turistik yig‘imni faqat xorijlik sayyohlarga xizmat ko‘rsatgan joylashtirish vositalari to‘lamoqda.

Mahalliy aholidan yig‘iladigan turistik (mehmonxona) yig‘im ichki turizmni targ‘ib qilish va rag‘batlantirish, turizm mavsumi past bo‘lgan davrda joylashtirish vositalarining bandligini ta'minlashga qaratilgan chora-tadbirlarni moliyalashtirishga yo‘naltiriladi.

Farmonga binoan, xorijiy aviakompaniyalarning Indoneziya, Bangladesh va Malayziya mamlakatlaridan xorijiy turistlarning O‘zbekistonga sayohatlarini tashkil etishga qaratilgan hamda «Umra+» dasturi doirasidagi O‘zbekistonga aviaparvozlari, qo‘nish va uchish xavfsizligi qoidalaridan tashqari, to‘sqinliksiz amalga oshiriladi.

Respublikaning turizm namoyishi obektlarini keng targ‘ib qilish, fuqarolarni boy tabiiy, madaniy va tarixiy meros obektlari bilan tanishtirish hamda ichki turizmni ommalashtirishga qaratilgan (tijorat maqsadlarni ko‘zlamagan) axborot ma'naviyat va ma'rifat masalalariga doir axborotga tenglashtiriladi.