O‘zbekistonda 3 ming 148 gektar yer maydoni uy-joy qurish maqsadida noqonuniy egallangan

2021 yil 1 yanvar holatiga ko‘ra, respublika bo‘yicha 49 ming 594ta holatda yerlarni o‘zboshimchalik bilan egallab olish holatlari aniqlangan. Bu haqda AOKAda bo‘lib o‘tgan brifingda Kadastr agentligi axborot xizmati rahbari Ne'mat Otamurodov ma'lum qildi.

Jami noqonuniy egallab olingan yerlar 11 ming 284 gektarni tashkil qilgan.

Xususan:

• suvli ekin yerlari – 6 ming 74 gektar;
• lalmi ekin yerlari – 1 ming 352 gektar;
• ko‘p yillik daraxtzorlar – 422 gektar;
• yaylovlar va pichanzorlar – 1 ming 533 gektar;
• boshqa toifadagi yerlar – 1 ming 905 gektar.

Ta'kidlanishicha, noqonuniy egallangan yerlarning eng katta qismi tomorqa sifatida foydalanish maqsadida (3 ming 364 gektar) o‘zlashtirilgan. Shuningdek, uy-joy qurish maqsadida (3 ming 148 gektar), baliq hovuzi qurish maqsadida (580 gektar), noturar joy qurish maqsadida (533 gektar) va boshqa maqsadlarda (3 ming 619 gektar) yer maydonlari egallab olingan.

Yer nazorati inspektorlari tomonidan 35 ming 715 nafar shaxsga bajarilishi majburiy bo‘lgan yozma ko‘rsatmalar berilgan.

Ma'lumot uchun, qonunchilikda yer uchastkalari o‘zboshimchalik bilan egallab olinganligi uchun ma'muriy jazo belgilangan. Jumladan yer uchastkalarini o‘zboshimchalik bilan egallab olgan fuqarolarga BHMning 10 barobaridan 15 barobarigacha, mansabdor shaxslarga esa 20 barobaridan 30 barobarigacha jarima solish yoki 15 sutkagacha qamoq jazosi belgilanadi.

Shuningdek, qonun buzilishi darajasiga qarab 3 yildan 5 yilgacha ozodlikdan mahrum qilish jazolari ham qo‘llanilishi mumkin.

Avvalroq, Andijonda oxirgi 3 yil davomida kadastr sohasiga aloqador 8ta korrupsiya va firibgarlik holatlarining 70 foizdan ko‘prog‘i sohaning sobiq xodimlari bilan bog‘liq ekani aytilgandi.