Suv ta'minoti va kanalizatsiya obektlari qurilishi bo‘yicha yangi tizim joriy etiladi

11 fevral kuni Uy-joy kommunal xizmat ko‘rsatish vazirining birinchi o‘rinbosari Sohib Saifnazarov ishtirokida «Suv ta'minoti va kanalizatsiya obektlari qurilishi bo‘yicha injiniring kompaniyasi» DUK faoliyatini ko‘rib chiqish, uni yangi boshqaruv tizimiga o‘tkazish masalasida yig‘ilish bo‘lib o‘tdi.

Yig‘ilishda xizmat vazifasiga sovuqqonlik bilan yondashgan «Suv ta'minoti va kanalizatsiya obektlari qurilishi bo‘yicha injiniring kompaniyasi» DUK bosh muhandisi egallab turgan lavozimidan ozod qilindi. Shuningdek, Qashqadaryo va Toshkent viloyati hududiy boshqarmalari boshliqlari yo‘l qo‘ygan kamchiliklari uchun lavozimidan ozod etildi. Injiniring kompaniyasi direktori va bosh hisobchisiga hayfsan berildi, bir qator boshqarma boshliqlari jiddiy ogohlantirildi.

«O‘zsuvta'minot» AJ boshqaruvi raisi tomonidan manzilli dasturlar doirasida ichimlik suvi va kanalizatsiya tarmoqlarini qurish va rekonstruksiya qilishda yo‘l qo‘yilgan kamchiliklar, qurilish sifatini ta'minlashda injiniring kompaniyasi sustkashligi tanqid qilindi.

Ma'lum qilinishicha, «Suv ta'minoti va kanalizatsiya obektlari qurilishi bo‘yicha injiniring kompaniyasi» DUKning yangi ustavi tasdiqlangan va endilikda ushbu kompaniya unitar korxona (UK) sifatida faoliyatini davom ettiradi, suv ta'minoti va kanalizatsiya qurilishi hamda loyihalashtirishda sifatni ta'minlash bo‘yicha yangi tizim joriy etiladi. Unitar korxona rahbariyati va hududiy boshqarma boshliqlarini tayinlash «O‘zsuvta'minot» AJ boshqaruvi raisi tomonidan amalga oshirilishi ta'kidlandi.

«Suv ta'minoti va kanalizatsiya obektlari qurilishi bo‘yicha injiniring kompaniyasi» unitar korxona bosh muhandisi lavozimiga shu vaqtga qadar Xorazm viloyati hududiy boshqarmasi boshlig‘i lavozimida ishlagan Xushnud Yoqubov tayinlandi.