IIV Ohangarondagi koloniyada mahkum qiynoqqa solinganini rad etdi. Uning telefonidan diniy materiallar topilgan

IIV Jazoni ijro etish bosh boshqarmasi o‘tkazgan dastlabki o‘rganish natijalariga ko‘ra, mahkum F.Mayunusovga manzil-koloniyada jazoni o‘tash shartlari, mahkumlarning huquq-majburiyatlari, muassasa ma'muriyatining qonuniy talablarini bajarish va internet tarmog‘iga ulanuvchi, video va ovoz yozishga mo‘ljallangan uyali aloqa vositasidan foydalanish mumkin emasligi tushuntirilgan bo‘lsa-da, u ichki tartib qoidalarga amal qilmasdan, «Samsung Galaxy Note 5» markali telefondan foydalangani aniqlangan.

Shu sabab bilan u manzil-koloniya boshlig‘ining qarori asosida intizomiy jazoga tortilgan.

«Mahkumning yashirin tarzda foydalangan uyali aloqa vositasi xotirasida aniqlangan diniy mazmundagi materiallarni O‘zbekiston Respublikasi hududida taqiqlangan yoki taqiqlanmaganiga aniqlik kiritish maqsadida sudga oid dinshunoslik ekspertizasi tayinlanib, O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaga yuborilgan.

Mahkum F.Mayunusovdan uyali aloqa vositasini xodimlar tomonidan rasmiylashtirib olinishi hamda intizomiy bo‘linmaga kiritish jarayoni bilan bog‘liq surishtiruv ishlari vaqtida, unga koloniya xodimlari tomonidan hech qanday ruhiy va jismoniy tazyiq o‘tkazilmaganini o‘z tushuntirish xatida ma'lum qilgan.

Shuningdek, birlamchi tibbiyot tekshiruvi natijasiga ko‘ra, uning badanida biror-bir tan jarohati izlari aniqlanmagan», – deyiladi IIV axborotida.

Avvalroq, Oliy Majlisning Inson huquqlari bo‘yicha vakili (ombudsman) matbuot xizmati mahkumga nisbatan sud-tibbiy ekspertizasi tayinlanganini ma'lum qilgan edi.

IIV axborot xizmati rahbari Shohrux G‘iyosovning Kun.uz'ga ma'lum qilishicha, jazoni ijro etish tizimidagi muassasalarda jazo muddatini o‘tayotgan shaxslar, sodir qilgan jinoyatidan qat'i nazar bir xil huquq va erkinliklarga ega bo‘lib, ulardan rejim talablariga rioya qilish birdek talab qilinadi.

Muassasalarda o‘rnatilgan tartib-qoidalarga rioya qilmay, tartibbuzarlik sodir qilgan mahkumlarga nisbatan O‘zbekiston Respublikasi Jinoyat-ijroiya kodeksining 105-moddasi talablari asosida intizomiy jazo choralari qo‘llaniladi.

«Shu o‘rinda ta'kidlab o‘tish kerakki, OAVda e'lon qilingan «Ohangaronda mahbusni mayor va operlar kaltakladi» sarlavhali maqolada 48-son manzil-koloniyada jazo muddatini o‘tayotgan mahkum F.Mayunusovga nisbatan tazyiq bo‘lganiga urg‘u berilgan. Hozirda muassasa ma'muriyatiga nisbatan tuhmat qilish va yolg‘on xabarlarni tarqatish sabablari tekshirilmoqda. Jazoni ijro etish muassasalarida mahkumlarning huquq va erkinliklari muhofazasi doimiy ravishda prokuratura organlari hamda Oliy Majlisning Inson huquqlari bo‘yicha vakili (ombudsman) tomonidan nazorat qilinadi», – deydi Shohrux G‘iyosov.

Kuni kecha Oliy Majlis deputati Rasul Kusherbayev JIEMlardagi qiynoqlar mavzusida fikr bildirgan edi.

Deputatning aytishicha, qamoqxonalardagi qiynoq holatlari aniqlanmay qolayotganining sabablaridan biri – bu borada tegishli xulosani beruvchi tibbiyot xodimlari Ichki ishlar vazirligiga bo‘ysunishidir. Qamoqxonalardagi tibbiyot xodimlarini IIV emas, Sog‘liqni saqlash vazirligi bo‘ysunuviga o‘tkazish haqida o‘tgan yili ombudsman kiritgan taklif ochiq qolgan.