Xuddi muammo yo‘qdek: Migratsiya agentligi BAAdagi muhojirlar lageri masalasiga munosabat bildirdi

Birlashgan Arab Amirliklariga safar qilgan Kun.uz muxbirlari O‘zbekiston Tashqi mehnat migratsiyasi agentligi tomonidan ushbu mamlakatga ishlashga yuborilgan vatandoshlar lageridan reportaj tayyorlagan, unda vatandoshlarning yashash sharoiti havas qilgudek emasligi, berilgan va'dalar esa qog‘ozda qolgani haqida so‘z borgandi.

Tashqi mehnat migratsiyasi agentligidan ma'lum qilishlaricha, maqola e'lon qilingan kunning ertasiga, 11 fevral kuni O‘zbekistonning BAAdagi elchisi Baxtiyor Ibragimov boshchiligidagi elchixona xodimlari o‘zbekistonlik mehnat migrantlari yashash joyiga borib, vaziyatni o‘rgangan.

Bayonotda O‘zbekiston fuqarolari uchun boshlang‘ich zaruriy sharoitlar yaratilgani, alohida 2 ta xona biriktirilgani, konditsioner va internet (WiFi) borligi, umumiy yuvinish xonasi va oshxona kuniga 2 martadan tozalanishi, o‘zbekistonlik mehnat muhojirlari kelishilganidek oyiga 425 dollar miqdoridagi maosh va tibbiy sug‘urta bilan ta'minlangani aytiladi.

«Chet ellik ishchilar uchun mo‘ljallangan yotoqxonada Hindiston, Pokiston, Bangladesh va Afrika davlatlaridan kelgan jami 3000 nafar mehnat migrantlari istiqomat qiladi. Yotoqxona ma'muriyatining ma'lum qilishicha, shu kunga qadar boshqa millat ishchilari tomonidan yashash sharoiti yomonligi to‘g‘risida e'tirozlar kelib tushmagan, 9 nafar o‘zbek ishchilari uchun alohida yashash binosi ajratish imkoni yo‘q.

Shu bilan birga, 9 nafar fuqaroning barchasi «Saned» tashkilotida ish faoliyatini davom ettirishini ma'lum qilgan.

Ayni paytda «Saned» kompaniyasi bilan o‘zbekistonliklar uchun yashash sharoitini yanada yaxshilash va eng maqbul variant ishlab chiqish choralari ko‘rilmoqda», – deyiladi bayonotda.

Rasmiy axborotda ushbu fuqarolarning BAAga ishga yuborilishi tarixi ham keltirib o‘tilgan.

«2020 yilning noyabr oyida BAAning qator kompaniyalari bilan olib borilgan muzokaralar natijasida O‘zbekiston fuqarolarini vaqtincha mehnat faoliyatini amalga oshirish uchun mazkur davlatga jalb qilish bo‘yicha kelishuvga erishilgan.

Amirlik kompaniyalari vakillari tomonidan Toshkent shahri, Samarqand va Namangan viloyatlarida ushbu davlatda «qo‘riqchi» vazifasida ishlash istagida bo‘lgan 376 nafar fuqaro o‘rtasida tanlov o‘tkazilgan va dastlab ulardan 73 nafari tanlab olingan.

Tanlovlardan muvaffaqiyatli o‘tgan nomzodlarga Tashqi mehnat migratsiyasi agentligi xodimlari tomonidan ish haqi, ishlash va yashash sharoitlari haqida to‘liq ma'lumot berilgan; xususan, BAA orqali boshqa davlatlarga chiqib ketish imkoniyati bilan qiziqqanlarga bu holat shartnoma shartlariga zid ekani tushuntirilgan. Shundan so‘ng ularning 13 nafariga hujjatlar rasmiylashtirilgan va 16 dekabr kuni ishlash uchun Sharja amirligiga jo‘nab ketgan.

Ushbu fuqarolar bilan Tashqi mehnat migratsiyasi agentligi xodimlari doimiy aloqada bo‘lib turgan. Bugungi kunga qadar ularning 2 nafari (1 nafari oilaviy sabab bilan, 1 nafari o‘z xohishiga ko‘ra) O‘zbekistonga qaytib kelgan va yana 2 nafari bilan mehnat shartnomasi bekor qilingan», – deyiladi agentlik axborotida.