Ruhoniy AQSh sanksiyalarining bekor qilinishi yadroviy kelishuvni saqlab qolishning yagona yo‘li ekanligini aytdi

Eron yadroviy dasturi bo‘yicha kelishuv muhokama qilinmaydi va AQSh sanksiyalarining bekor qilinishi uni saqlab qolishning yagona yo‘li hisoblanadi. Bu haqda Eron prezidenti Hasan Ruhoniy Fransiya prezidenti Emmanyuel Makron bilan telefon orqali muloqotida aytdi.

"Yadroviy kelishuv qayta muhokama qilinmaydi va uni saqlab qolishning yagona yo‘li – bu AQSh tomonidan sanksiyalarning bekor qilinishi", - deya uning so‘zlaridan iqtibos keltirmoqda ISNA agentligi.

Uning qo‘shimcha qilishicha, "Eron o‘z majburiyatlarini bajarishni kamaytirishiga AQShning yadroviy kelishuvdan chiqishi va bergan va'dalarini bajarmaganligi sabab bo‘ldi".

2020 yil dekabrda qabul qilingan qonunga muvofiq, Eronda 23 fevraldan yadroviy obektlarning Xalqaro atom energiyasi agentligi (XAEA) tomonidan nazorat qilinishi cheklandi.

Shu bilan birga, Eron XAEA 23 fevraldan boshlab yadroviy obektlardagi kuzatuv kameralari ma'lumotlariga kirishdan mahrum bo‘lishini, ammo ushbu ma'lumotlar AQSh sanksiyalari bekor qilinishi ehtimoli uchun uch oy davomida saqlanishini bildirdi. Ta'kidlanishicha, agar Vashington ushbu muddat ichida yadroviy kelishuvga qaytmasa, kameralar qayd etgan barcha ma'lumotlar o‘chirib tashlanadi.