Abdulla Qodiriy bog‘ida yana bitta mehmonxona quriladi

20 mart kuni Hampton by Hilton Tashkent Park Abdula Kodiri mehmonxonasining poydevoriga vaqt kapsulasini qo‘yish marosimi bo‘lib o‘tdi. Mehmonxona Toshkent markazidagi Abdulla Qodiriy bog‘i ichida quriladi.

Shahar hokimligi matbuot xizmati xabariga ko‘ra, loyihani ham investor, ham quruvchi sifatida Qozog‘istonning BI Group kompaniyasi amalga oshiradi.

0,75 gektar maydonni egallaydigan loyihaga 100 milliard so‘mdan ortiq investitsiya kiritiladi.

«Mehmonxonadan 120 xona va biznes-markaz o‘rin oladi. Loyiha joriy yilning may oyida boshlanib, 2022 yil iyun oyida foydalanishga topshiriladi», – deyiladi rasmiy relizda.

Qurilish uchun yer maydoni qanday shartlar asosida ajratilgani ma'lum qilinmagan.

Abdulla Qodiriy bog‘ida boshlangan investitsiya loyihalari

2019 yilda Abdulla Qodiriy bog‘ini keng miqyosda qayta ta'mirlash haqida qaror chiqqan. Lex.uz bazasiga kiritilmagan qarorda 16,5 gektarlik bog‘ hududida 14 ta loyihani amalga oshirish belgilangan.

Shahar hokimligi o‘sha yili bog‘ni yangilash uchun davlat budjetidan pul ajratilmasligini ma'lum qilgandi. Bog‘ni obodonlashtirish, u yerda yozuvchiga haykal qo‘yish, kutubxona va ijod maktabi qurish kabilar investitsiya sharti sifatida belgilangan.

Bu yerdagi loyihalardan biri – Yaponiyaning H.I.S. Hotel Holdings Co. Ltd. kompaniyasi qurayotgan 4 yulduzli mehmonxona. 5 qavatli, 140 xonali otel qurilishi 13 mln dollarga baholangan. O‘zbekistondagi ilk yapon mehmonxonasi 2021 yil oxirida foydalanishga topshirilishi kutilmoqda.

Toshkentda 2 ta Hampton by Hilton paydo bo‘ladi

Hampton by Hilton Tashkent Park Abdula Kodiri – BI Group va Hilton Worldwide'ning to‘rtinchi qo‘shma loyihasidir.

O‘tgan yili BI Group xoldingi va Hilton Worldwide o‘rtasida Markaziy Osiyoda 10 ta Hampton by Hilton mehmonxonalarini qurish bo‘yicha kelishuv imzolangan. Ulardan biri Toshkentdagi Vestminster universiteti ro‘parasida qurilmoqda.

20 mart kungi marosimda poytaxt hokimi o‘rinbosari – Investitsiya va tashqi savdo boshqarmasi boshlig‘i Sharof Rahmonov, Olmazor tumani hokimi Abdumajid Mullajonov va BI Group kompaniyasi vakillari ishtirok etgan. Qozog‘iston tarafidan respublikaning O‘zbekistondagi elchixonasi maslahatchi-elchisi Qanat Hasenov va BI Group direktorlar kengashi raisi Aydin Rahimbayev vakillik qilgan.

Ma'lumot uchun, BI Group – Qozog‘iston ko‘chmas mulk bozoridagi yetakchi qurilish xoldinglaridan biri. 1995 yilda faoliyat boshlagan xolding dunyoning eng yirik qurilish kompaniyalari ENR Top 250 Global Contractors reytingiga kiradi.