Qiynoq uchun jinoiy javobgarlik kuchaytiriladi

Bosh prokuratura tomonidan ishlab chiqilib, Oliy Majlisga taqdim etilgan qonun loyihasida qiynoqqa solish va qadr-qimmatni kamsituvchi muomala hamda jazo turlarini qo‘llaganlik uchun jazo choralarini kuchaytirish hamda qiynoq va boshqa shafqatsiz xatti-harakatlar natijasida zarar ko‘rgan fuqarolarga moddiy va ma'naviy zararning davlat tomonidan qoplanishi mexanizmini qonun darajasida mustahkamlash nazarda tutilmoqda.

Senatning Mudofaa va xavfsizlik masalalari qo‘mitasi tomonidan «Qiynoq holatlarini aniqlash va ularning oldini olish tizimini takomillashtirish» mavzusida o‘tkazilgan davra suhbatida Bosh prokuratura boshqarma katta prokurori Elyor Jabborov qonun loyihasidagi yangiliklarni ma'lum qildi.

Unga ko‘ra, qiynoq bilan bog‘liq jinoyat sodir etgan shaxslarga nisbatan Jinoyat kodeksining 64-moddasiga asosan javobgarlikka tortish muddatining o‘tib ketganligi munosabati bilan jinoyat uchun javobgarlikdan ozod qilish hamda 73-moddasiga asosan jazoni o‘tashdan muddatidan ilgari shartli ozod qilish kabi normalarning qo‘llanmasligi nazarda tutilmoqda.

Shuningdek, qiynoq uchun JK 235-moddasining ikkinchi qismining sanksiyasida ozodlikdan mahrum qilish jazosini 7 yildan 10 yilgacha, uchinchi qismining sanksiyasida 10 yildan 15 yilgacha uzaytirish taklif etilmoqda.

Bundan tashqari, Fuqarolik kodeksining 991 va 1021-moddalariga qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash bilan bog‘liq jinoyat natijasida fuqaroga yetkazilgan moddiy va ma'naviy zarar tergovga qadar tekshiruvni amalga oshiruvchi organlar, surishtiruv, dastlabki tergov, prokuratura organlari va sud mansabdor shaxslarining aybidan qat'i nazar to‘lanishiga oid qo‘shimchalar kiritilmoqda.