Farg‘onada milliy gvardiya xodimi xizmat mashinasida odam urib yubordi. Jabrlanuvchi vafot etdi

Farg‘ona tumanida milliy gvardiya harbiy xizmatchi S.Sh. 2 aprel kuni xizmat yuzasidan «Farg‘ona-Vodil» yo‘nalishida harakatlanib ketayotib, piyodalar o‘tish uchun belgilanmagan joyda yo‘lni kesib o‘tayotgan fuqaro B.N.ni urib yubordi.

Milliy gvardiya axborotiga ko‘ra, hodisadan so‘ng xodim o‘z avtomashinasida jabrlanuvchini RShTYoIM Farg‘ona shahar filialiga olib borgan. Jabrlanuvchi olgan jarohatlari oqibatida vafot etgan.

Holat yuzasidan jinoyat ishi ochilganicha yo‘q. Farg‘ona viloyati harbiy prokuraturasi tergov oldi harakatlarini olib bormoqda.

«UAZ Pikap» rusumli avtomashina Milliy gvardiyaning Farg‘ona viloyati boshqarmasiga tegishli. Mashina prokuratura ixtiyoriga topshirilgan.

Kun.uz manbasiga ko‘ra, Marhum 26 yoshda bo‘lgan. Holat yuzasidan harbiy prokuratura Jinoyat kodeksining tegishli moddasi bilan jinoyat ishi qo‘zg‘atgan.