Qulflangan xonadagi bolalar, pishmagan tovuq va korrupsiya – MTV Samarqanddagi bog‘chalar bo‘yicha o‘rganish natijalarini e'lon qildi

Ta'kidlanishicha, o‘rganishlarda bog‘chalardagi ayrim tarbiyachi-pedagoglar xizmat vazifasini to‘liq bilmasligi, ovqatlantirish me'yorlariga rioya etilmayotgani, ta'lim-tarbiya jarayonlari yaxshi yo‘lga qo‘yilmagani, bolalarni yo‘llanmalar asosida maktabgacha ta'lim tashkilotlariga qabul qilishdagi xato va noqonuniy xatti-harakatlar aniqlangan.

«Jumladan, Samarqand shahar 58-sonli DMTTda karantin talablariga rioya etilmagan holda ish faoliyati olib borilmoqda.

Maktabgacha ta'limni boshqarish axborot tizimida (OpenEmis) tashkilotda tarbiyalanuvchilar soni 186 nafar, navbatda turganlar soni 160 nafar bo‘lsa-da, tashkilot direktori tomonidan tarbiyalanuvchilar soni 141 nafar ekani to‘g‘risida ma'lumot taqdim etildi.

Bolalarni MTMga qabul qilish bo‘yicha yo‘llanmalar saylanma tarzda o‘rganilganda, tarbiyalanuvchilar tashkilot direktori tomonidan belgilangan talablarga zid ravishda qabul qilingani aniqlangan.

Bolalar davomatini qayd etish daftarida ularning kelgan va kelmagan kunlari tahlili qilinmagan, hamshira, tarbiyachi va direktor tomonidan imzolanmagan.

Shuningdek, tashkilot direktori N.Hamrayeva tomonidan imzolangan buyruqlarga asosan haqiqatda ishlamagan 5 nafar xodimga jami 17 mln 793 ming 838 so‘m ish haqi to‘lab yuborilgani aniqlandi.

Tarbiyachi D.ga 2020 yilning fevral-iyun oylarida haqiqatda vazifasini bajargan bo‘lsa-da, jami 2 mln so‘mlik ish haqi to‘lanmagan.

Samarqand shahar prokuraturasi ma'lumotiga ko‘ra, tashkilot direktori 2019 yilning avgust-sentyabr oylarida jami 31 nafar tarbiyalanuvchini ro‘yxatdan o‘tmagan qalbaki yo‘llanmalar asosida qabul qilgan», – deyiladi brifingda.

Asqarxo‘jayevaga ko‘ra, Samarqand shahridagi 50, 126, 13, 98-DMTTlarida  ham pandemiya davrida qo‘yiladigan vaqtinchalik sanitariya-gigiyenik talablariga rioya etilmagan. 

«98-MTTda hamshira xonasida birinchi yordam uchun berilgan dori-darmonlarning muddati o‘tgan va ro‘yxatda ko‘rsatilmagan antibiotiklar saqlangan.

13-MTT oshxonasida kunlik menyu mavjud emas. Tashkilotda qarindosh-urug‘chilik munosabatlarini ham uchratish mumkin. Jumladan, metodist va xo‘jalik ishlari mudiri tashkilot direktorining qarindoshlari ekani aniqlandi.

Pullik xizmat sifatida tashkil etilgan rus tili, ingliz tili, taekvondo va badiiy gimnastika to‘garaklari uchun to‘langan pul tashkilotning hisobraqamiga kirim qilinmagan.

Oshpazlar kunlik taomlarni bolalar soniga nomutanosib, taomlarga solinishi lozim bo‘lgan mahsulotlar miqdori ko‘rsatilishi lozim bo‘lgan menyusiz tayyorlashayotgani bolalar haqqini talon-toroj qilayotgani emasmi?» – ta'kidlanadi ma'lumotda.

O‘rganishlarda Payariq tumanidagi 31- va 38-sonli DMTTlarda ham bolalar guruhlarga noqonuniy qabul qilingani aniqlangan.

«Bu MTTlar stol-stullar va bolalar krovatlari bilan to‘liq ta'minlanmagan, rivojlantiruvchi markazlar uchun xonalarda maydon hamda bolalar uchun o‘yinchoqlar yetishmasligi, bolaning rivojlanish xaritasi o‘z vaqtida to‘ldirilmagani ayon bo‘ldi.

Ishchi guruh 31-MTTdagi o‘rganish bilan ovora bo‘lganda, oshpaz pishib turgan ovqatga xom tovuq go‘sht solib yuborganiga guvoh bo‘lindi. Bunda me'yor talabidagi go‘sht mahsuloti pishgan ovqatga xomligicha solingan. 

Tumandagi 38-MTTdagi o‘rganishda esa binoda qulflangan xona borligi ishchi guruh a'zolarida shubha uyg‘otgan. Ochib tekshirilganda esa xonada 20ta bolalar krovati va 10 nafar bola borligi aniqlandi.

Tarbiyalanuvchilarning 29 nafarida yo‘llanmalar mavjud emas.

Omborxonadagi mavjud oziq-ovqat mahsulotlari tekshirilganda, ko‘plab ortiqcha mahsulotlar aniqlangan. Bu talon-torojliklar ayon bo‘lganda o‘z arizasiga asosan xo‘jalik ishlari mudiri bilan mehnat shartnomasi bekor qilindi.

Oqdaryodagi 7-MTTda esa ta'minotchi tomonidan MTTga sariyog‘ o‘rniga «Spred» (sut yog‘i o‘rnini bosuvchi modda) mahsuloti olib kelingani aniqlangan.

Tekshiruvlar davomida Samarqand shahridagi 50-MTTga tushdan keyin noma'lum ayol 4 nafar bolani yetaklab kelib, u qorovul tomonidan to‘xtatilmagani ishchi guruhi a'zolarida shubha uyg‘otgan.

Bu bolalar to‘g‘risida MTT direktori M.Umirovadan so‘ralganda, u hech qanday ma'lumotga ega emasligini aytgan.

Surishtiruvlar natijasida bu 4 nafar bolaning 2 nafari tashkilot xodimlarining farzandi, qolganlari qisqa muddatli guruh tarbiyalanuvchilari ekani aniqlandi. Shuningdek, bolalar tashkilot yaqinidagi 113-uyda yollanma tarbiyachining uyida saqlanishi va tashkilotda ovqatlanishi ma'lum bo‘ldi.

Urgut tumanidagi 2 MTTdagi holat ham qoniqarsiz deb topildi. 15-MTT binosi ta'mirtalab holatda», – dedi vazirlik matbuot xizmati rahbari.

Ta'kidlanishicha, o‘rganishlar yakunida vazirlik mulozimlari ishtirokida viloyat va tuman mudirlari MTT direktorlari ishtirokida tanqidiy-tahliliy yig‘ilish o‘tkazilgan.