19:43 / 21.04.2021
10567
Сенат Автомобил йўллари қўмитаси раҳбариятига матбуот анжуманларига яхши тайёргарлик кўрган ходимларни юборишни тавсия қилди
Фото: Олий Мажлис Сенати ахборот хизмати
Сенатнинг Мудофаа ва хавфсизлик масалалари қўмитаси раиси Қутбиддин Бурҳонов 20 апрел куни Kun.uz сайтида эълон қилинган «Ким ҳақ? — Автомобил йўллари қўмитаси Сенатнинг йўллар носозлиги оқибатида юз берган автоҳалокатлар бўйича маълумотини рад этди» сарлавҳали хабар юзасидан ўз муносабатини билдирди.
 
Унда айтилишича, Йўл ҳаракати хавфсизлиги бош бошқармаси томонидан 2020 йилнинг 24 сентябр куни Автомобил йўллари қўмитасига республикадаги умумфойдаланишдаги автомобил йўлларининг ҳолати, уларда олиб борилаётган таъмирлаш ишлари, шунингдек, содир бўлаётган йўл-транспорт ходисаларининг келиб чиқиш сабаблари ўрганиб чиқилгани юзасидан тақдимнома киритилган.

«Тақдимномада ИИВ Йўл ҳаракати хавфсизлиги бош бошқармаси томонидан олиб борилган ўрганишлар натижасида автомобил йўлларининг таъмирлаш ишлари олиб борилаётган, бу ишлар охирига етказилмасдан қолиб кетган ҳамда таъмирланиши лозим бўлган жойларда 2019 ва 2020 йилнинг 8 ойи ичида 532 та ЙТҲ содир бўлгани, улардан 191 киши вафот этгани ва 511 киши жароҳатлангани аниқлангани қайд этилган.

Бу маълумотлар Вазирлар Маҳкамасига йўл ҳаракати хавфсизлигини таъминлаш ва соҳага оид қонун ҳужжатларининг ижро этилиши ҳолати юзасидан юборилган парламент сўрови натижалари муҳокамасида ҳам айтиб ўтилган.

Давлат йўл ҳаракати хавфсизлиги хизмати ходимлари томонидан ҳаракат хавфсизлигини таъминлаш, йўл-транспорт ҳодисаларининг олдини олиш юзасидан маҳаллий ҳокимликлар ҳамда тегишли ташкилот ва идораларга 2017-2020 йиллар давомида жами 6 минг 709 та тақдимнома киритилган бўлса-да, уларнинг 3 минг 173 таси ёки 45 фоизи белгиланган муддатларда ижро этилмаган.

Бундан ташқари, мутахассислар томонидан йўл-транспорт ҳодисаларининг келиб чиқишига сабаб бўлаётган автомобил йўлларини зарур даражада таъмирлашга эътибор қаратилмагани оқибатида 2019 йилда ва 2020 йилнинг 8 ойи давомида 532 та йўл-транспорт ҳодисаси содир этилиб, уларда 511 нафар фуқаро жароҳатланган ва 191 нафар фуқаро ҳалок бўлган.

Бу каби камчиликлар Давлат йўл ҳаракати хавфсизлиги хизмати ходимлари томонидан киритилаётган тақдимномалар ижросини таъминламаган мутасаддиларга нисбатан таъсирчан чоралар кўришни тақозо этмоқда, дея айтиб ўтилган», – деб эслатилади муносабатда.

Қўмита раиси шундан келиб чиқиб, Автомобил йўллари қўмитаси раҳбариятига келгусида фуқароларни атрофлича ўрганилмаган маълумотлар билан чалғитмаслик учун матбуот анжуманлари ёки интервьюларда пухта тайёргарлик кўрган раҳбар ходимлари иштирок этишини таъминлашни тавсия қилган.

«Акс ҳолда бундай ҳолатлар юқоридаги каби ОАВ ва кенг жамоатчилик орасида давлат ва нодавлат ташкилотлари имижига нисбатан салбий таъсир этувчи тушунмовчиликларни келтириб чиқаради», – дейди Қутбиддин Бурҳонов.

Муносабатда шунингдек, ИИВ Йўл ҳаракати хавфсизлиги бош бошқармасининг 2020 йил 24 сентябрда Транспорт вазирлиги ҳузуридаги Автомобил йўллари қўмитасига юборган 24/6-19/66-сон хати ҳам илова қилинган.

Top