20:04 / 26.04.2021
845
Самарқандда аёл танишининг суратларини тарқатиш билан таҳдид қилиб пул олган эркак ушланди

Самарқанд вилояти Нарпай туманида аёл танишининг ножўя кўринишда тушган суратларини тарқатиш билан таҳдид қилиб пул олган эркак қўлга олинган. Бу ҳақда ИИВ ҳузуридаги тергов департаменти хабар бермоқда.

Маълум қилинишича, 2021 йил 23 апрел куни соат 13:00 да 30 ёшли Қ.Озоджон Нарпай тумани Амир Темур маҳалласида таниши 28 ёшли Р.Ферузанинг ножўя кўринишдаги суратларини тарқатиш билан таҳдид қилган. У суратларни ижтимоий тармоқларга тарқатиб юбормаслик эвазига Р.Ферузадан 1,5 миллион сўм пул сўраган. Сўнг, ушбу пуллардан 1 миллион сўмни товламачилик йўли билан олаётган вақтида Нарпай тумани ИИБ ЖҚБ ходимлари томонидан қўлга олинган. Товламачидан кимёвий ишлов берилган 1 миллион сўм пуллар ашёвий далил тариқасида расмийлаштириб олинган.

Қайд этилишича, олиб борилган терговга қадар текширув давомида, Қ.Озоджон 2021 йил апрел ойининг бошида Р.Ферузанинг ножўя кўринишидаги расмларини телефонидан ўчириб ташлаш эвазига ундан 300 минг сўм пулларни товламачилик йўли билан олганлиги аниқланган.

Таъкидланишича, мазкур ҳолат юзасидан Нарпай тумани ИИБ ҳузуридаги тергов бўлими томонидан Қ.Озоджонга нисбатан жиноят кодексининг 165-моддаси 2-қисми «а» банди билан жиноят иши қўзғатилиб, гумон қилинувчи тариқасида жалб қилинган. Ҳозирда тергов давом этмоқда.

Top