Rossiya qurolli kuchlari «ko‘rinmas» aviabomba bilan qurollanadi

Rossiya qurolli kuchlari 2021 yilda “Drel” deb ataluvchi aviabomba bilan qurollanadi. Ta'kidlanishicha, ushbu bombani radarlar yordamida deyarli aniqlab bo‘lmaydi.

Foto: TASS

“Sinovlar natijalari aviabombaning jangovar samaradorligini tasdiqladi. Ushbu bombani 2021 yil uchun davlat mudofaa buyurtmasiga muvofiq sotib olish rejalashtirilgan”, deb ma'lum qilgan Rossiya bosh vaziri o‘rinbosari Yuriy Borisov.

Avvalroq Borisov yangi qurol bilan tezkor-taktik aviatsiya samolyotlari, jumladan, 5-avloddagi Su-57 qiruvchilari ta'minlanishini ma'lum qilgan.

Ma'lumotlarga ko‘ra, “Drel” o‘zi uchuvchi aviabomba bo‘lib, “Bazalt” birlashmasi tomonidan ishlab chiqilgan. Bomba zirhli texnika, yerdagi radiolokatsion stansiyalar, energetik qurilmalarni boshqarish punktlari va zenit-raketa majmualarini yo‘q qilishga mo‘ljallangan. Bombaning uchish masofasi 30 kmdan ko‘proqni tashkil qiladi. Buning evaziga uni dushmanning havo hujumiga qarshi mudofaa tizimlari ta'siri doirasiga kirmasdan qo‘llash mumkin. Bomba navigatsiya uchun GLONASS tizimidan foydalanadi. U 15ta o‘zi nishonga oluvchi jangovar element bilan jihozlangan. Belgilangan trayektoriyaning oxirida ushbu elementlar tashuvchidan ajralib, nishonga olingan obektlar ustiga parashyutlarda tushadi.

Bombaning yana bir ustunligi uning radioelektron kurash vositalari va radarlar uchun “ko‘rinmasligi” hisoblanadi. Buning evaziga bombani ishdan chiqarish yoki urib tushirish o‘ta murakkab hisoblanadi.

Mutaxassislarning fikricha, bombaning bosh ustunligi – arzonligidir. “500 ming dollarlik raketani terrorchilar jipiga qarshi qo‘llash ma'nosizdir. Bundan tashqari, bombaning arzonligi uni ommaviy qo‘llash imkonini beradi”, deb ta'kidlab o‘tishgan mutaxassislar.

#Rossiya #aviabomba