19:24 / 16.05.2021
18148
Россиялик овчига «Қизил китоб»даги иккинчи айиқни отишга рухсат берилмайдиган бўлди

Иккита қўнғир айиқни отишга рухсат берган Экология қўмитаси биринчи айиқ ўлдирилгач, иккинчиси учун рухсатини қайтариб олди.

Ўзбекистонда «Қизил китоб»га киритилган қўнғир айиқ россиялик овчи томонидан ўлдирилган эди. Унга Экология қўмитаси раиси рухсатнома бергани жамоатчилик эътирозига сабаб бўлмоқда.

Рухсатнома 2 та айиқни отиш учун берилган бўлиб, овчида яна бир айиқни отиш ҳуқуқи сақланиб қолаётганди.

Норозиликлардан сўнг, Экология қўмитаси бу рухсат бекор қилинишини билдирди.

«Россиялик овчи Е.П Широковга қўмита томонидан ов қилиш учун рухсатнома жорий йилнинг 3 мартдан 31 декабрь кунигача берилган. 2021 йил «Қизил китоб»га киритилган қўнғир айиқни овлаш учун ажратилган квотадаги 2 та айиққа ариза Россия фуқароси Е.П.Широковдан келиб тушганлиги учун ҳам рухсатнома унга берилган эди.

Квотадаги иккинчи айиқ ўрнатилган тартибда, яъни қонун устуворлигидан келиб чиққан ҳолда кўрилиб, бўлиб ўтган жамоатчилик эътирозини инобатга олиб, иккинчи айиқни отишга рухсат берилмайди», – дея қўмитанинг Биохилмахиллик ва муҳофаза қилинадиган табиий ҳудудлар бош бошқармаси бошлиғи Абдурашид Содиқовдан иқтибос келтирмоқда Ekologuz Telegram-канали.

Содиқов рухсат бекор қилинишига ҳуқуқий асослар бор-йўқлиги масаласига аниқлик киритмаган. Овчи иккита айиқни ов қилишга рухсатнома учун пул тўлаган, унинг компенсацияси қай тартибда ҳал этилиши номаълум.

Экоқўм бошқарма бошлиғи, айни ҳолат бўйича қўмита матбуот хизмати эълон қилган дастлабки баёнотдаги сингари, айиқни овлашга рухсат берилган ҳолатда барчаси қонуний бўлганига урғу берган.

Унинг тушунтиришича, «Ов қилиш ва овчилик хўжалиги тўғрисида»ги қонунга асосан, «Қизил китоб»га киритилган ҳайвонларни чекланган миқдорда овлаш мумкин. Бунинг учун ҳар йили квота ажратилади. Нечта квота ажратишни Экология қўмитаси ҳал қилади; бунда ов қилишга келиб тушган аризалар сонига қаралади, Фанлар академиясидан хулоса олинади.

Бироқ жамоатчиликнинг бир қатор саволлари очиқ қолмоқда:

  • «Қизил китоб»га киритилган ҳайвонларни отишга рухсат беришдан мақсад нима?
  • Қоплон, сиртлон, силовсин, бурама шохли така, сайғоқ, хонгул, қўнғир айиқ каби «Қизил китоб»га киритилган жониворларнинг бир йилда нечтасини отиш мумкинлигини қўмита қандай қилиб аниқлайди?
  • Келиб тушган аризалар сонига қаралиши нимани англатади? Қанча кўп ариза келиб тушса, шунча кўп ноёб ҳайвонни отишга рухсат бериладими?
  • Ноёб ҳайвонларни умуман овламаса нима бўлади?
  • Рухсатнома учун талабгор овчилар бир нечта бўлганда, улар қандай танланади? Бу жараён коррупциядан холими?
  • Овчи «Қизил китоб»даги ҳайвонни ўлдириб, уни шу ҳолида суратга олиб тарқатиши қанчалик мақсадга мувофиқ? Қўмита бунинг айниқса ёшлар дунёқарашига таъсири ҳақида ўйлаши керак эмасми?

UPD. Экология қўмитаси 17 май, душанба куни айни мавзу юзасидан матбуот анжумани ўтказишини маълум қилган.

Top